“Kabare” premierë në Teatrin e Gjilanit

Arte

Gazeta Express

03/02/2026 17:04

Më 5 shkurt në Teatrin e Gjilanit luhet premierë shfaqja “Kabare” me regji të Zana Hoxha.

Për shfaqjen:

Joe Masteroff dikur shkroi:

Kishte një kabare, dhe një mjeshtër ceremonish… kishte një qytet me emrin Berlin, në një vend të quajtur Gjermani… dhe ishte fundi i botës.”

Në skenën tonë, historia zhvendoset kështu:

Ka një kabare. Ka një ceremoni-mjeshtër.

Dhe ka një qytet që quhet Prishtinë, në një vend që quhet Kosovë – në vitet e para pas luftës. Një kohë e trazuar, plot shpresa, absurditete, ëndrra dhe zhgënjime. Një botë që kërkon ta gjejë veten mes dritave të skenës dhe errësirës së realitetit.

Nga kjo frymë lind “KABARE 1999” – një shfaqje që e kthen kujtesën kolektive në teatër. Nën regjinë e Zana Hoxhës, kabareja bëhet metaforë e një epoke, një hapësirë ku humori takohet me dhimbjen, ku muzika përballet me heshtjen, dhe ku e kaluara dialogon me të tashmen.

“KABARE 99” nuk është vetëm një premierë – është një rikthim në shpirtin e teatrit si vend i rrëfimit, i kujtesës dhe i rezistencës artistike.

Shfaqja është bashkëprodhim mes Teatrit të Gjilanit dhe organizatës Artpolis.