Juventusi e mbanë në ‘radar’ Donnarumman, derisa City ia vë syrin Di Gregorios

Sport

Gazeta Express

15/06/2025 17:56

Portierët e Juventusit po tërheqin shumë interes këtë verë, me Manchester City-n që po ndjek nga afër Michele Di Gregorio dhe Milanin që lidhet me Mattia Perin, ndërsa Gianluigi Donnarumma mbetet një objektiv.

Bianconerët janë në një fazë transformimi, pasi Igor Tudor ka firmosur kontratë të re dhe tashmë ka më shumë fuqi në strategjinë e merkatos.

Perin pritet gjerësisht të largohet gjatë verës, pasi dëshiron më shumë minuta loje dhe mund të ribashkohet me Massimiliano Allegrin te Milani. Klube të tjera të interesuara për të janë Como dhe Monza, që ka rënë nga Serie A, sipas raportimeve të Matteo Moretto dhe Calciomercato.com.

Edhe Di Gregorio nuk është i sigurt për qëndrimin, sidomos nëse Manchester City intensifikon përpjekjet për ta transferuar.

Kjo do të thotë që Juventus mund të ketë nevojë të sjellë dy portierë të rinj, dhe natyrshëm vëmendja e tyre do të kthehet tek Gianluigi Donnarumma. Portieri i kombëtares italiane ndodhet në vitin e fundit të kontratës së tij me Paris Saint-Germain dhe, edhe pse ai ka theksuar se prioriteti i tij është rinovimi, kjo nuk është aspak e sigurt.

PSG nuk dëshiron të rrezikojë ta humbasë me parametër zero, ndaj mund të shtyjë drejt një shitjeje këtë verë. Kandidatë të tjerë për portën e Juventusit, sipas gazetës “L’Unione Sarda”, përfshijnë edhe Elia Caprile, të cilin Cagliari pritet ta blejë përfundimisht për 8.5 milionë euro pas huazimit nga Napoli./GazetaExpress/