Izraeli thotë se ka goditur në “zemër të Teheranit”: Sulmet do të vazhdojnë me forcë të plotë

Lajme

Gazeta Express

23/06/2025 14:00

Izraeli ndërmori sulme ndaj “zemrës së Teheranit” të hënën, tha ministri i mbrojtjes, ndërsa mediat shtetërore iraniane dhe dëshmitarët okularë raportuan goditje në të gjithë kryeqytetin iranian.

Re të mëdha tymi mbuluan pjesë të qytetit, tha një banor për CNN. Sulmet goditën gjithashtu Rrugën Jordan, një lagje e dendur dhe e pasur në veri të kryeqytetit, shtoi ai.

“Duket se goditën rëndë një qendër tregtare, pashë të paktën tetë re të ndryshme nga goditjet”, shtoi banori. “Rruga Jordan u godit rëndë”.

Një tjetër dëshmitar tha për CNN: “Kjo ishte seria më e rëndë e shpërthimeve deri tani. Ishte tmerruese”.

Ushtria izraelite po “godet objektiva të regjimit” në “zemër të Teheranit, me forcë të paprecedentë”, tha ministri i Mbrojtjes i Izraelit, Israel Katz, në një deklaratë më herët të hënën.

“Për çdo zjarr të drejtuar ndaj frontit të brendshëm izraelit – diktatori iranian do të ndëshkohet rëndë dhe sulmet do të vazhdojnë me forcë të plotë”, shtoi Katz.

Universiteti prestigjioz Shahid Beheshti, në veri të Teheranit, u godit gjithashtu, sipas agjencisë së lajmeve Mehr, të lidhur me shtetin.