Izraeli thotë se Irani tentoi të sulmonte shtetas izraelitë në Qipro, arrestohet një ‘spiun iranian’

Lajme

Gazeta Express

21/06/2025 19:02

Ministri i Jashtëm i Izraelit ka deklaruar se Garda Revolucionare e Iranit ka tentuar të kryejë një sulm ndaj shtetasve izraelitë në Qipro.

Në një postim në rrjetin X, Gideon Sa’ar tha se sulmi u parandalua falë bashkëpunimit mes autoriteteve të sigurisë qipriote dhe shërbimeve izraelite të sigurisë, raporton Sky News, përcjell Gazeta Express.

Ai nuk dha detaje të mëtejshme mbi sulmin e pretenduar, ndërsa nuk ka pasur ende një reagim zyrtar nga Irani.

Arrestohet një ‘spiun iranian’ në Qipro

Kjo deklaratë vjen në të njëjtën ditë kur autoritetet qipriote konfirmuan arrestimin e një shtetasi britanik nën dyshime për vepra të lidhura me terrorizmin dhe spiunazhin.

Mediat lokale raportuan se i dyshuari kishte vëzhguar një bazë ushtarake britanike të RAF në Akrotiri, si dhe një bazë qipriote, që nga mesi i prillit.

Aktualisht nuk dihet nëse ky person ka lidhje me komplotin e përmendur nga Sa’ar.