Izraeli e shpalli të vdekur, por pas një jave këshilltari i Khameneit shfaqet me mesazh: Jam gjallë

Lajme

Gazeta Express

20/06/2025 14:29

Ali Shamkhani, një nga figurat më të larta politike dhe ushtarake të Iranit, ka mohuar raportimet për vdekjen e tij pas sulmeve të 13 qershorit, duke deklaruar se është gjallë dhe në gjendje stabile.

Disa media, përfshirë Agjencinë e Lajmeve Fars të kontrolluar nga IRGC-ja dhe agjencinë gjysmëzyrtare të lajmeve Mehr, publikuan një deklaratë që i atribuohet Shamkhanit.

Javën e kaluar, të njëjtat agjenci raportuan se ai ishte vrarë në valën e parë të sulmeve ajrore të Izraelit më 13 qershor. “Jam gjallë dhe gati të sakrifikoj veten”, thuhet në deklaratën që i atribuohet Shamkhanit.

Shamkhani, një këshilltar i afërt i Khameneit dhe ish-kreu i Këshillit të Lartë të Sigurisë Kombëtare, u raportua si i vdekur nga mediat izraelite dhe disa burime iraniane pas një sulmi ajror izraelit. Më vonë, mediat iraniane njoftuan se ai kishte qenë i plagosur rëndë dhe po trajtohej në spital, por tashmë ndodhet në gjendje të qëndrueshme.

Me përvojë të gjatë në Gardën Revolucionare Islamike dhe në Ministrinë e Mbrojtjes, Shamkhani ka qenë një figurë kyçe në bisedimet për programin bërthamor iranian me Shtetet e Bashkuara dhe fuqitë perëndimore.