Izmaku: Do të kemi votë brenda Kuvendi, por do të shohim nëse ka marrëveshje politike

Lajme

Gazeta Express

12/08/2025 14:04

Deputetja e Nismës Socialdemokrate, Xhevahire Izmaku, ka thënë se tre deputetët e këtij subjekti politik do të votojnë në seancën konstituive duke iu bindur vendimit të Gjykatës Kushtetuese e cila u ka bërë thirrje deputetëve që të jenë prezentë dhe të votojnë për konstituimin e Kuvendit.

Por, deputetja Izmaku nuk ka treguar nëse se a do të jetë vota e tyre pro apo kundër kandidatit të LVV-së për kryeparlamentar.

 Sipas saj, Nisma ende synon këtë postë, derisa të ketë një rrethanë tjetër politike.

“Jemi me pozicionin e vjetër sepse konsiderojmë se pasi nuk kemi zhvilluar bisedime të reja për një pozicion tjetër atëherë ne qëndrojmë në atë pozicion. Pra, Nisma e ka deklaruar publikisht që ne jemi subjekti i parë shqiptar që kemi ofruar dorën e bashkëpunimit tri votat tona që të dalim nga ngërçi politik. Kemi me qenë përsëri në tavolinë për rrethana të tjera politike. Ne kemi marrë një mandat nga kryesia e partisë që bisedimet t’i vazhdojmë për pozitën e kryetarit të Kuvendit”.

“Nuk ka bisedime të reja dhe as kërkesa të reja. Për rrethanat e reja që janë krijuar me aktvendimin e ri të Gjykatës Kushtetuese, nëse do të kërkohet nga ne si NISMA që të hymë në një marrëdhënie të re politik dhe të bëhen kërkesa tjera ne prap do t’i thërrasim anëtarët e kryesisë dhe do të bisedojmë për një pozicion tjetër politik. Ne do t’i bindemi rregullave të vendimit të Gjykatës Kushtetuese që ne do të kemi votë brenda në Kuvend, e si do të jetë ajo votë do të shohim në bazë të rrethanave që do të krijohen nëse do të kemi një marrëveshje politike”, ka thënë ajo për rtv21.