Ismet Kryeziu kritikon KQZ-në për moscertifikimin e Listës Serbe: Po cenohet barazia dhe e drejta për garim

Lajme

Gazeta Express

21/08/2025 19:30

Drejtori i Institutit Demokratik të Kosovës (KDI), Ismet Kryeziu, ka reaguar pas vendimit të Komisionit Qendror të Zgjedhjeve për të moscertifikuar Listën Serbe në zgjedhje.

Ai e ka cilësuar këtë si një qasje që cenon barazinë dhe të drejtën për garim, duke e krahasuar me “gjykime dhe linçime publike”.

“KQZ-ja, e përbërë nga një ‘tavolinë burrash’, nuk e paska certifikuar Listën Serbe për garim në zgjedhje, dhe vendimet e saj po kthehen në gjykime e linçime publike. Me këtë qasje cenohet barazia dhe e drejta për garim, ndërsa institucionit i vihet një peshë në qafë për folklorizëm politik, ndërsa Kosova zhvlerëson fuqinë e saj dhe bëhet më e cenueshme”, ka shkruar ai.

Sipas Kryeziut, patriotizëm sot nënkupton respektimin e rendit kushtetues dhe integrimin e komunitetit serb në Kosovë, e jo përjashtimin e tyre nga proceset politike.

“Është e dhimbshme kur një klasë politike bie pre e demagogjisë dhe, për një grusht votash, e vendos Kosovën në linjat e kuqe si vend që cenon të drejtat e komuniteteve pakicë, duke dëmtuar imazhin dhe partneritetin ndërkombëtar”, shtoi ai.