KDI i drejtohet VV’së: Qeveria të krijohet urgjentisht

Gazeta Express

14/01/2020 16:50

 Instituti Demokratik i Kosovës ka kërkuar nga Lëvizja Vetëvendosje që të  formojnë sa më shpejtë qeverinë e re, raporton Gazeta Express.

Instituti Demokratik i Kosovës (KDI), vlerëson qasjen konstruktive të subjekteve politike për konstituim pa vonesë të Kuvendit, më 26 dhjetor të vitit që lamë, megjithatë korniza institucionale në bazë të rezultateve të zgjedhjeve të 6 tetorit 2019 mbetet ende pa u kompletuar tërësisht.

“ Duke pasur parasysh që vendi është duke u udhëhequr nga një Qeveri në dorëheqje prej më shumë se gjashtë muajsh, vlerësojmë se krijimi i Qeverisë së re është urgjent”, thuhet në njoftimin që KDI ka nisur për media.

Tutje, në këtë komunikatë, KDI ka kërkuar nga LV-ja që të gjejë një zgjidhje sa më të shpejtë për formimin e qeverisë së re.

“Duke qenë se kanë kaluar 100 ditë që nga mbajtja e zgjedhjeve, proces ky i zhvilluar në përputhje me standardet demokratike dhe me rezultate të pranuara dhe legjitime, KDI-ja kërkon nga Lëvizja Vetëvendosje, si subjekti politik fitues i zgjedhjeve, të gjejë një zgjidhje sa më të shpejtë për formimin e Qeverisë së Republikës së Kosovës në marrjen e detyrave dhe përgjegjësive kushtetuese e ligjore.

Secila vonesë në materializimin e vullnetit politik dhe besimit të qytetarëve, do të ndikojë negativisht në adresimin e çështjeve që kërkojnë trajtim të menjëhershëm, siç janë miratimi i buxhetit, sundimi i ligjit dhe zhvillimi ekonomik”, shkruhet në njoftim./GazetaExpress/