Irani emëron kreun e ri të Këshillit të Sigurisë

Lajme

Gazeta Express

06/08/2025 7:40

Ali Larijani, këshilltari konservator i udhëheqësit Suprem të Iranit, Ajatollah Ali Khamenei, është emëruar sekretar i përgjithshëm i Këshillit të fuqishëm të Sigurisë së vendit, njoftoi sot Teherani.

Larijani, 67-vjeç, pason ish-komandantin e Korpusit me ndikim të Gardës Revolucionare Islamike, Ali Akbar Ahmadian, i cili do të marrë një pozicion të sapokrijuar në qeveri, sipas agjencisë shtetërore të lajmeve “Tasnim”.

Këshilli i Sigurisë merret me çështje që lidhen me sigurinë kombëtare dhe vendimet që ndërmerren për  mbrojtjen e vendit islamik dhe ka diskutuar shpesh programin bërthamor të vendit në të kaluarën.

Vendimet e tij për çështje të tilla duhet të miratohen nga udhëheqësi suprem i vendit.

Këshilli kryesohet nga presidenti Masoud Pezeshkian dhe përfshin dhjetëra anëtarë të tjerë, përfshirë disa ministra dhe gjeneralë.

Mbetet e paqartë nëse emërimi i nivelit të lartë do të sjellë një ndryshim kursi brenda aparatit të pushtetit të Iranit.