IKSHPK apelon për kujdes nga gjarpërinjtë – Jep rekomandime se si të veprohet në rast të kafshimit

Lajme

Gazeta Express

18/06/2025 16:29

Instituti Kombëtar i Shëndetësisë Publike të Kosovës, ka apeluar te qytetarët për kujdes të shtuar dhe të mbrohen nga kafshimet e gjarpërinjve, duke qëndruar të sigurt gjatë kohës në natyrë.

Nga IKSHPK është bërë e ditur edhe për hapat që duhet ndërmarr në rast të kafshimet ku theksohet se personat e kafshuar duhet të qëndrojnë të qetë dhe mos të lëvizin shumë; Të mbajnë gjymtyrën e kafshuar të palëvizshme dhe nën nivelin e zemrës; Të thërrasin urgjencën (194), policinë (192) ose të shkojnë menjëherë në qendrën më të afërt shëndetësore.

Po ashtu, nga IKSHPK është apeluar për kujdes që personat e kafshuar të mos e prekin apo presin vendin e kafshimit; Të mos e thithin apo ndrydhin helmin nga vendi i kafshimit; Dhe të mos i vendosin rrip apo çfarëdo lloj lidhëse plagës së kafshimit.

Postimi:

MBROHUNI NGA KAFSHIMET E GJARPËRINJVE!

Qëndroni të sigurtë gjatë kohës sa shijoni natyrën!

KU NDODHEN GJARPËRINJTË?

• Në vende të thata dhe shkëmbore

• Në pyje, në degë të drunjve, nën gurë, grumbuj drunjëve, apo rrënoja të vjetra

• Pranë lumenjve, pusetave të ujit, liqeneve ose tokave bujqësore

KUR JANË AKTIVË?

• Nga muaji maj deri në shtator, sidomos në ditë të nxehta

• Rrinë gjatë të kamufluar/fshehur mirë duke pritur gjahun e tyre

• Njeriu nuk është cak i kafshimit të gjarpërit, por nësë shkelet padashje ose ngacmohet, atëhere gjarpëri sulmon njeriun!

SI TË MBROHEMI:

✅ VISHUNI SI DUHET

• Veshje të gjata dhe çizme kur ecni në natyrë

• Përdorni shkop për të kontrolluar shkurret apo gurët para se të hidhni hapin

✅ ECNI ME KUJDES

• Shmangni barin e lartë dhe rrugicat e papastruara

• Mbani oborrin dhe ambientin përreth shtëpisë të pastër – hiqni gurët, grumbujt e drunjëve dhe shkurret ku gjarpërinjtë mund të strehohen

✅ NË MBRËMJE

• Përdorni dritë dore gjatë natës në vende të errëta ose në natyrë

KUJDES:

❌ Mos u afroni dhe mos u përpiqni të ngacmoni apo vrisni gjarpërinjtë

❌ Mos fusni duart në vrima (në tokë apo në drunj të gjatë), nën gurë apo në shkurre

❌ Mos ecni zbathur në natyrë

NËSE JU KAFSHON GJARPËRI:

1. Qëndroni të qetë dhe mos lëvizni shumë

2. Mbajeni gjymtyrën e kafshuar të palëvizshme dhe nën nivelin e zemrës

3. Thirrni urgjencën (194), policinë (192) ose shkoni menjëherë në qendrën më të afërt shëndetësore

KUJDES:

❌ Mos e prekni apo preni vendin e kafshimit

❌ Mos e thithni apo ndrydhni helmin nga vendi i kafshimit

❌ Mos i vendosni rrip apo çfarëdo lloj lidhëse plagës së kafshimit

🧠 Kujdes! Shumica e gjarpërinjve në Kosovë nuk janë helmues, por kafshimi nga NEPËRKAT (gjarpërit më helmues në Evropë) mund të jetë i rrezikshëm pa trajtim!