Hundë e rrjedhshme dhe sy që të kruhen? Eksperti paralajmëron: Fajin mund ta ketë pema juaj e Krishtlindjes

Keshilla Mjekësore

Gazeta Express

02/12/2025 19:19

Ato sjellin atmosferë festash në çdo shtëpi, por pema e Krishtlindjes mund të jetë edhe shkaktare e hundës së rrjedhshme, teshtimës, kollës dhe syve që kruhen, paralajmëron farmacisti Noel Wicks.

Ai thotë se shumë njerëz preken nga ajo që quhet “Sindroma e Pemës së Krishtlindjes” – një reagim alergjik i ngjashëm me alergjinë nga poleni.

Çfarë e shkakton sindromën?

Sipas ekspertit, problemet nisin nga:

poleni që pemët reale mbledhin jashtë para se të priten,

myku që qëndron në trungje dhe degë, duke u shumëzuar në ambiente të ngrohta,

pluhuri, i cili grumbullohet si në pemët natyrale ashtu edhe në ato artificiale.

Studime të mëparshme kanë zbuluar dhjetëra lloje myku në pemët e Krishtlindjes, të cilat mund të shkaktojnë sy të skuqur e të lotuar dhe vështirësi në frymëmarrje.

Aroma karakteristike e pemës vjen nga terpenet, përbërës në lëkurën dhe rrëshirën e saj – dhe disa njerëz janë alergjikë ndaj tyre. Edhe kimikatet bujqësore të përdorura në kultivimin e pemëve mund të shkaktojnë irritime.

Ndërkohë, marimangat e pluhurit – një prej alergjenëve më të zakonshëm – futen lehtësisht në shtëpi bashkë me pemët artificiale dhe dekorimet e ruajtura gjatë vitit. Këto mikro-organizma mund të rëndojnë simptomat e astmës, ekzemës, si edhe të shkaktojnë teshtima, hundë të rrjedhshme dhe sy të irrituar.

Si ta parandaloni Sindromën e Pemës së Krishtlindjes

Eksperti jep disa këshilla praktike për të shmangur alergjitë festive:

Vendosni maskë kur nxirrni dekorimet nga bodrumi apo podrumi, për të shmangur thithjen e pluhurit dhe mykut.

Shpëlani pemën natyrale me ujë para se ta fusni në shtëpi dhe lëreni të thahet plotësisht.

Tundeni mirë pemën jashtë, për të hequr polenin, pluhurin dhe mykun e lirshëm.

Pastroni pemët artificiale dhe dekorimet, për të larguar pluhurin e akumuluar.

Mos i mbani pemët natyrale shumë gjatë brenda, pasi myku rritet shpejt në ambiente të ngrohta.

Ruajini pemët artificiale dhe zbukurimet në kuti hermetike, për të minimizuar mbledhjen e pluhurit gjatë vitit.

Ekspertët thonë se ndjekja e këtyre hapave mund të ulë ndjeshëm rrezikun e alergjive dhe ta bëjë sezonin e festave më të këndshëm për të gjithë familjen. /GazetaExpress/