Hansi Flick me dy kërkesa ndaj bordit të Barcelonës

Sport

Gazeta Express

07/06/2025 16:39

Barça ka nisur të planifikojë merkaton e verës me një qasje më funksionale sesa mediatike. Me Hansi Flick tashmë në krye dhe i vetëdijshëm për kufizimet financiare të klubit, përparësia është zhvendosur drejt një strategjie që lejon përforcimin e dy zonave kyçe të fushës pa kompromentuar ekuilibrin ekonomik. Në këtë kontekst, dy emra kanë fituar terren: Ademola Lookman dhe Alejandro Grimaldo. Të dy lojtarët janë kërkuar posaçërisht nga trajneri i ri i Barçës dhe mund të vijnë për një investim të përbashkët prej 45 milionë eurosh, sipas asaj që raporton Nacional Cat.

Lookman, aktualisht te Atalanta, ka qenë një nga zbulimet e sezonit në Itali. Anësori nigerian, i cili mund të luajë në të dyja krahët, ka treguar vazhdimësi në performancë dhe ka qenë vendimtar në momente kyçe. Flick vlerëson veçanërisht aftësinë e tij për të thyer linjat, përfshirjen në detyra mbrojtëse dhe fleksibilitetin taktik. Për më tepër, lojtari është i hapur për një kalim te Barça, gjë që lehtëson negociatat.

Ndërkohë, situata e Grimaldos duket edhe më e arritshme. Mbrojtësi i majtë, i formuar te La Masia, mund të rikthehet në Camp Nou pasi është spikatur te Benfica dhe Bayer Leverkusen. Klauzola e tij e largimit është e përballueshme dhe përshtatja e tij me stilin e lojës së Barçës është e padiskutueshme. Ndërkombëtari spanjoll do të sillte thellësi, përvojë europiane dhe një alternativë reale për Alejandro Balde, gjendja fizike e të cilit kërkon ende menaxhim të kujdesshëm.

Ndërsa afrimi i yjeve të mëdhenj si Nico Ëilliams apo Rafael Leao do të kërkonte angazhime financiare më të rrezikshme, formula Lookman-Grimaldo po fiton gjithnjë e më shumë mbështetje në zyrat blaugrana. Flick është i qartë: më shumë sesa emra të mëdhenj, ai kërkon zgjidhje. Dhe për 45 milionë euro, Barça mund të zgjidhë dy probleme njëherësh.