Hamasi publikon videon e dytë të pengut izraelit dhe thotë se nuk do të çarmatoset derisa të krijohet shteti palestinez

Lajme

Gazeta Express

03/08/2025 9:59

Hamasi ka riafirmuar se nuk do të çarmatoset nëse nuk krijohet një shtet i pavarur palestinez, pasi grupi publikoi videon e dytë brenda dy ditësh të një pengu izraelit.

Duke iu përgjigjur njërës prej kërkesave kryesore izraelite për t’i dhënë fund luftës në Gaza, Hamasi – i cili ka dominuar territorin që nga viti 2007 – tha se nuk mund të heqë dorë nga e drejta e tij për “rezistencë të armatosur” nëse nuk krijohet një “shtet palestinez i pavarur, plotësisht sovran me Jerusalemin si kryeqytet”.

Të shtunën, Hamasi publikoi një video të dytë të pengut Evyatar David. Në të, David është shumë i dobët dhe shfaqet duke hapur një gropë, të cilën, siç thotë ai në video, e ka për varrin e tij.

Negociatat indirekte midis Hamasit dhe Izraelit që synonin sigurimin e një armëpushimi 60-ditor në luftën e Gazës dhe një marrëveshje për lirimin e pengjeve përfunduan javën e kaluar në bllokim.

Nga 251 pengjet e marra gjatë sulmit të Hamasit, 49 prej tyre ende mbahen në Gaza, përfshirë 27 që ushtria izraelite thotë se janë të vdekur. /TheGuardian/