Guardiola: Ky është vendimi i imë më i mirë i këtij sezoni

Futboll

Gazeta Express

10/04/2026 18:19

Trajneri i Manchester City, Pep Guardiola, ka zbuluar se vendimi më i mirë që ka marrë këtë sezon ishte emërimi i Bernardo Silva si kapiten i skuadrës.

City po hyn në fazën vendimtare të garës për titull në Premier League, duke ndjekur Arsenal. Edhe pse humbën terren pas barazimeve ndaj Nottingham Forest dhe West Ham, skuadra ka rikthyer besimin me fitore të rëndësishme, përfshirë triumfin në finalen e Carabao Cup dhe fitoren bindëse 4-0 ndaj Liverpool në FA Cup.

Guardiola e vlerësoi lart Silvën, duke theksuar se ai është një lider i vërtetë dhe një nga lojtarët më të rëndësishëm që ka pasur ndonjëherë. Sipas tij, portugezi ka treguar gjithmonë se skuadra vjen mbi gjithçka, sidomos në momentet më të vështira.

Ai kujtoi sezonin e kaluar si shembullin më të mirë, kur Silva qëndroi i qëndrueshëm dhe udhëhoqi ekipin pavarësisht problemeve me lëndimet. Guardiola theksoi se, edhe pse nuk është lojtari më fizik apo më spektakolar në statistika, ai ka një shpirt garues të jashtëzakonshëm dhe shfaqet gjithmonë në ndeshjet e mëdha.

Në të njëjtën kohë, e ardhmja e Silvës mbetet e paqartë, pasi pritet që ai të largohet në fund të sezonit. Vetë lojtari ka lënë të kuptohet se arsye personale dhe kulturore mund ta shtyjnë drejt një rikthimi në Evropën jugore.

Guardiola pranoi se do të dëshironte që ai të qëndronte, por theksoi se vendimi përfundimtar i takon lojtarit.

Sa i përket garës për titull, trajneri spanjoll u shpreh realist: për të pasur shanse ndaj Arsenalit, City duhet të fitojë të gjitha ndeshjet e mbetura. Ai pranoi se mungesa e qëndrueshmërisë gjatë sezonit i ka kushtuar ekipit, duke e vënë tani në një situatë ku nuk ka më vend për gabime. /GazetaExpress/