GPS në veturë, Vehbi Kajtazi live në Pressing: Dyshohet se i përket AKI-së, është pajisje vëzhguese e përgjuese

Lajme

Gazeta Express

31/10/2024 21:10

Gazetari Vehbi Kajtazi deklaroi sonte në Pressing se GPS-i që u gjet i vendosur në veturën e tij dyshohet se i përket AKI-së. Sipas tij, pajisja në fjalë është vëzhguese dhe përgjuese.

Gazetari Kajtazi, tha se “regjimi” ka futur gazetarët si subjektë të përndjekjes dhe hetimit.

“Ky regjim ka futur gazetarët si subjekte të përndjekjes dhe hetimit sepse ne nuk i pëlqejmë rëgjimit për shkak të aryre që flasim dhe atyre që shkruajmë dhe ekspozimit të korrupsionit, krimit, që i bëjmë kësaj qeverie. Intensifikimi i përgjimit ka ndodhur në momentin që kam publikuar bisedën e fundit të Mimoza Kusari-Lilës me terroristin Milan Radojiçiq…po flasim për hetim të paligjshëm sepse s’ka vendim të Gjykatës Supreme për këtë çështje”, tha Kajtazi sa i përket deklaratave të tij se është duke u hetuar paligjshëm.

Ai tha se pajisja u gjet kur e dërgoi veturën për kontrollim teknik.

“Gjatë kontrollit të veturës njëri nga punëtorët e ka vërejtë që në anën e majtë të rrotës është i vendosur një mjet që dukej i dyshimtë…Shihej që ishte GPS, kjo pajisje e cila i përket institucioneve ligjzbatuëse të Kosovës”, tha Kajtazi në Pressing, transmeton Express.

“Dyshohet që i përket AKI-së”, shtoi Kajtazi për GPS-in në fjalë.

“Është pajisje përgjuese dhe vëzhguese, ka kapacitet për incizim ambiental. Nëse telefonin e ki të lidhur në veturë atëherë dëgjohet në vazhdimësi dhe regjistrohet nga kjo pajisje”, deklaroi Kajtazi.