Google paralajmëron përdoruesit për rreziqet e Wi-Fi-t publik – kriminelët mund të vjedhin të dhënat tuaja BANKARE

AutoTech

Gazeta Express

11/11/2025 20:12

Miliona njerëz përdorin Wi-Fi publik për të kursyer të dhëna mobile, por Google paralajmëron se ky zakon i rrezikshëm mund të komprometojë sigurinë tuaj.

Në një dokument të ri, gjigandi teknologjik këshillon përdoruesit e smartfonëve të “shmangin përdorimin e Wi-Fi publik sa më shumë që të jetë e mundur”.

Sipas Google, këto rrjete shpesh janë të pakriptuara dhe lehtësisht të sulmueshme nga hakerët, që do të thotë se informacioni që dërgoni mund të mos jetë i sigurt.

Nëse hyni me të dhënat e bankës ose kredencialet tuaja gjatë lidhjes me Wi-Fi publik, ato mund të përfundojnë në duart e kriminelëve.

Ekspertët e sigurisë kibernetike e mbështesin këshillën e Google, sidomos kur përdoruesit hyjnë në informacione të ndjeshme online.

Dr Manny Niri, lektor i lartë i sigurisë kibernetike në Oxford Brookes University, tha se paralajmërimi i Google “ka kuptim”:

“Wi-Fi publik mund të jetë i rrezikshëm sepse shumë rrjete nuk janë të kriptuara. Hakerët në të njëjtin rrjet mund të përpiqen të kapin të dhënat tuaja ose të krijojnë hotspot-e false për të mashtruar përdoruesit.”

Google publikoi këshillat e saj në një dokument 10-faqësh me titull “Behind the Screen” për tetorin 2025, duke dhënë udhëzime për të shmangur mashtrimet tekstuale.

Dokumenti këshillon: “Monitoroni rregullisht llogaritë tuaja bankare dhe raportin e kreditit”, pasi ato mund të jenë sinjalet e para që jeni komprometuar.

Gjithashtu, Google thekson: “Përdorni gjithmonë versionet më të fundit të sistemit operativ dhe patch-et e sigurisë nga prodhuesi i pajisjes suaj.”

Oliver Buxton, ekspert kibernetik në Norton, paralajmëron se hotspot-et falas mund të lënë përdoruesit të ekspozuar ndaj sulmeve online:

“Shumë Wi-Fi publik transmetojnë të dhënat në tekst të thjeshtë, që i bën të prekshme nga kriminelët kibernetikë. Hakerët mund të kapin aktivitetet tuaja online, përfshirë informacionin bankar, kredencialet e hyrjes dhe mesazhet personale.”

Një rrezik shtesë janë hotspot-et mashtruese, që imitojnë rrjete legjitime për të mashtuar përdoruesit.

“P.sh., nëse jeni në një hotel dhe zgjidhni Wi-Fi-n me emrin e ngjashëm me rrjetin e hotelit, mund të lidheni me një ‘evil twin’ dhe kriminelët të kenë qasje në trafikun tuaj,” tha Buxton.

Jake Moore, këshilltar sigurie në ESET, rekomandon që përdoruesit të kontrollojnë gjithmonë se janë lidhur me rrjetin e vërtetë përpara se të hyjnë online.

Dr Niri shton se niveli i rrezikut varet nga përdorimi i pajisjes dhe masat që merrni:

“Përdorimi i VPN, vizita vetëm në faqet e sigurta (https) ose kalimi në të dhëna mobile është shumë më i sigurt. Nëse duhet të përdorni Wi-Fi publik, shmangni hyrjen në llogari të rëndësishme, si banka ose email, dhe mbani gjithmonë softuerin të përditësuar.”

Përveç këtyre rreziqeve, Google paralajmëron për sms dhe mesazhe mashtruese që synojnë të vjedhin të dhënat personale. Shpesh përdorin taktika urgjence, gabime drejtshkrimore ose lidhje të dyshimta.

Ekspertët këshillojnë të ndiqni disa rregulla bazë për t’i identifikuar:

Autoriteti: Kujdes ndaj mesazheve që pretendojnë të jenë nga banka ose autoritete të tjera.

Urgjenca: Mos u nxitoni nga kërcënimet ose afatet e shkurtra.

Emocioni: Mos lejoni që paniku, frika apo kurioziteti t’ju mashtrojnë.

Mungesa e burimeve: Oferta që duket shumë e mirë për të qenë e vërtetë shpesh janë mashtrime.

Ngjarje aktuale: Kriminelët përdorin lajmet ose eventet e fundit për të dukur të besueshëm. /GazetaExpress/