Goditje e rëndë për personat me alergji nga kikirikët: Tërhiqet ilaçi i vetëm që parandalonte reaksionet vdekjeprurëse

Ushqimi/Dieta

Gazeta Express

30/01/2026 18:34

Të rinjtë që vuajnë nga alergjia ndaj kikirikëve kanë marrë një lajm shqetësues këtë javë, pasi u njoftua se ilaçi i vetëm që reduktonte rrezikun e reaksioneve vdekjeprurëse alergjike po hiqet nga tregu farmaceutik.

Kompania Stallergenes Greer, prodhuesja e trajtimit imunologjik Palforzia, sqaroi se vendimi nuk lidhet me shqetësime për sigurinë e ilaçit, por bëri të ditur se prodhimi i tij do të ndërpritet në mbarë botën. Vendimi është cilësuar si “shqetësues” dhe “tronditës” për familjet nga organizata bamirëse Anaphylaxis UK, e cila theksoi se aktualisht nuk ekziston asnjë alternativë tjetër e licencuar e imunoterapisë për alergjinë ndaj kikirikëve.

Sipas organizatës, pa këtë trajtim, fëmijët e diagnostikuar me alergji nga kikirikët do të duhet të vazhdojnë shmangien strikte të tyre, si dhe të mbajnë gjithmonë me vete medikamentet emergjente dhe planin e veprimit në rast alergjie.

Palforzia u zhvillua fillimisht nga kompania Aimmune Therapeutics, e cila u ble nga Nestlé në vitin 2020 për rreth 2.1 miliardë paund. Më pas, në vitin 2023, Nestlé ia shiti ilaçin Stallergenes Greer. Në atë kohë, Palforzia u përshkrua në media si një “dështim komercial”, për shkak të përdorimit më të ulët sesa pritej nga mjekët.

Prodhuesi ka rënë dakord për një periudhë tranzicioni, gjatë së cilës pacientët aktualë do të mund të vazhdojnë trajtimin, por ka këshilluar që pas datës 1 prill të mos pranohen pacientë të rinj.

Palforzia, një pluhur që përmban sasi shumë të vogla mielli kikiriku të standardit farmaceutik, u miratua për përdorim nga Shërbimi Shëndetësor Kombëtar britanik (NHS) në vitin 2021, një vit pasi mori miratimin nga Administrata Amerikane e Ushqimit dhe Barnave (FDA).

Trajtimi funksionon duke ekspozuar gradualisht pacientin ndaj dozave gjithnjë e më të mëdha të proteinës së kikirikut, duke “ritrajnur” sistemin imunitar dhe duke ulur ndjeshmërinë ndaj reaksioneve të rënda. Ilaçi duhet të merret çdo ditë dhe kërkon kontrolle të rregullta mjekësore për monitorimin e efekteve anësore.

Edhe pse pacientëve u këshillohet ende të shmangin kikirikët, Palforzia ul rrezikun e anafilaksisë, forma më e rëndë dhe kërcënuese për jetën e reaksionit alergjik, e cila mund të shkaktojë ënjtje të rrugëve të frymëmarrjes dhe mbytje. Në disa raste, edhe gjurmë minimale kikiriku në ushqim mund të jenë fatale.

Alergjia ndaj kikirikëve prek një në 50 fëmijë, rreth 240 mijë në Mbretërinë e Bashkuar dhe rreth një milion në SHBA, duke e bërë atë një nga alergjitë ushqimore më të përhapura. Ndërsa një në pesë fëmijë e “kalon” alergjinë me kalimin e viteve, për shumicën ajo mbetet e përjetshme.

Raste tragjike kanë theksuar rrezikun: në vitin 2020, një 23-vjeçar nga Newcastle humbi jetën pas konsumimit të një pice që përmbante pluhur kikiriku, ndërsa në vitin 2023, një studente 19-vjeçare në SHBA vdiq pasi hëngri një brownie me miell kikiriku të pjekur.

Anaphylaxis UK e quajti vendimin “një hap prapa për komunitetin e personave me alergji”, por shtoi se kërkimet për trajtime të reja po vazhdojnë, veçanërisht në fushën e imunoterapisë me ushqime reale, me synimin që këto metoda të bëhen më të sigurta, më efektive dhe më të aksesueshme përmes NHS në të ardhmen.

Organizata u këshilloi pacientëve që aktualisht marrin Palforzia të vazhdojnë dozën e tyre dhe të konsultohen me ekipin mjekësor për çdo shqetësim, duke paralajmëruar gjithashtu kundër përpjekjeve për krijimin e një versioni “shtëpiak” të trajtimit me miell kikiriku.

Sipas tyre, Palforzia është një produkt farmaceutik i prodhuar sipas standardeve strikte të cilësisë, pastërtisë dhe qëndrueshmërisë, dhe trajtohet për të eliminuar ndotës natyrorë si kërpudhat, kontrolle që nuk aplikohen zakonisht në miellin e zakonshëm të kikirikut.

Në një deklaratë për Daily Mail, një zëdhënës i Stallergenes Greer tha se vendimi për ndërprerjen e Palforzia-s erdhi pas një rishikimi strategjik, duke theksuar se kompleksiteti administrativ dhe kërkesat e dozimit kanë kufizuar përdorimin e tij në praktikën klinike, pavarësisht efikasitetit dhe sigurisë së dëshmuar. /GazetaExpress/