“Glauku mua, unë Glaukun”, Konjufca ‘lodhet’ duke e nominuar Kurtin – edhe një herë plot lëvdata për liderin

Lajme

Gazeta Express

27/11/2025 11:21

Edhe një tjetër proces zgjedhor do të zhvillohet në vend. Ai i 28 dhjetorit për zgjedhjet e jashtëzakonshme parlamentare, pasi që formimi i qeverisë së re s’ishte i mundur qe nga zgjedhjet e 9 shkurtit. Bashkë me caktimin e datës së zgjedhjeve, tashmë janë caktuar edhe të propozuarit e partive për kryeministër, shkruan Gazeta Express.

Për dallim nga partitë e tjera, Lëvizjes Vetëvendosje, i ka rënë që të ketë më shumë ‘telashe’ me këtë çështje, meqë, nga kjo parti janë propozuar dy emra për pozitën e kryeministrit. Së pari ishte Albin Kurti, e më pas, para pak javësh, u mandatua Glauk Konjufca për të njëjtin post. 

Por, për dallim nga ndryshimi i emrit, ajo çfarë vazhdon njësojë tek kjo parti, janë lëvdatat për njëri-tjetrin, e kritikat për ish-partitë opozitare.

Këtë e bëri edhe dje Kurti, në mbledhjen e Këshillit të Përgjithshëm të VV’së, ku u propozuar sërish për kryeministër. Aty Kurti kujtoi se ai e kishte propozuar Konjufcën pak javë më parë, duke theksuar se ‘’krejt bashkë’’ janë në VV.

‘’Para tri jave unë e propozova para jush mandatarin për formimin e qeverisë së Republikës së Kosovës, Glauk Konjufcën. Sonte Glauk Konjufca më propozoi mua. Glauku unë, unë Glauku, Albulena, Dimali, dhe cilido tjetër ne jemi krejt bashkë në Lëvizjen Vetëvendosje dhe ata që janë bashkuar kundër VV’së sepse duan të vendosë dikush tjetër  besoj se do ta marrin mesazhin e qartë pikërisht me 28 dhjetor, atëherë kur vendosë populli të cilit ne i shërbejmë’’, tha Kurti dje.

Pas tij, radha i erdhi sërish Konjufcës. Si në mbledhjen e kaluar të KP’së së VV’së, edhe në këtë rast, Konjufca s’i kurseu aspak lëvdatat për të Kurtin.

Fillimisht, ai e vlerësoi Kurtin si ‘’liderin e vërtetë të transformimit social e demokratik të Kosovës.

‘‘Ne jemi mbledhur që sot ta nominojmë kryeministrin e ardhshëm nga radhët e VV’së. Unë do ta nominojë me të votuarin nga populli ynë në historinë e demokracisë sonë parlamentare, me meritorin e udhëheqjes e LVV’së, liderin e vërtetë të transformimit social e demokratik të Kosovës, kryeministrin më të suksesshëm të Republikës sonë, Albin Kurtin’’, deklaroi fillimisht Konjufca.

Më tej, Konjufca vazhdoi me fjalët e mira për liderin e tij, duke deklaruar mes tjerash se, Kurti ka qenë gjithmonë ‘’ i gatshëm të jap e të sakrifikojë më së shumti’’ nga të gjithë anëtarët e VV’së.

‘’Të gjithë jeni duke thënë me siguri, kush do ta meritonte më shumë se ai. Themelues i VV’së, drejtues i saj nëpër të gjitha furtunat më të vështira të kohës, gjithnjë duke qenë i gatshëm të jap e të sakrifikojë më së shumti nga ne të gjithë, Albini, mendoj që njihemi aq gjatë e kemi vepruar aq gjatë sa me iu drejtu me Albini, Albini që me mençuri e transformojë VV’në, në subjektin më të madh politik jo vetëm në Kosovë. Kurti si kryeministri e krijoi një sistem të qeverisjes mbi parimin e rritjes ekonomike që shpërndahet në mënyrë të barabartë, e të drejt në popullin tonë. Albin Kurti që ia tregoi shtetin strukturave të Serbisë edhe në veri të vendit tonë. Albin Kurtin, sot më shumë se kurrë e kërkon populli ynë që ta vazhdojë rrugën e mirë që e nisi në vitin 2021’’, tha ai dje.

Ndryshe, këto s’janë lëvdatat e vetme që Konjufca i ka thurur për ‘’bashkëudhëtarin’’ e tij. Njëjtë veproi edhe në mbledhjen e KP’së të kësaj partie, ku u mandatua si mandatar i dytë për kryeministër.

Edhe në këtë mbledhje, Konjufca e kishte vlerësuar Kurtin si ‘’kryeministrin më të mirë që ka pasur ndonjëherë’’ Kosova.

“I dashur bashkëudhëtar në fillim të udhëtimit tonë, i nderuari kryetar i Vetëvendosjes, Kryeministër i Republikës, miku im, Albin Kurti, më lejoni t’ju siguroj që në fillim se populli shumë shpejt pret që të ktheheni edhe më të fortë se në vitin 2021. Pa dyshim, ju keni qenë dhe do të mbeteni kryeministri më i mirë që ka pasur ndonjëherë vendi ynë. Me përulësi dhe detyrim, duhet ta pranoj këtë nominim të Këshillit të Përgjithshëm për kryeministër të emëruar. Albin Kurti është personi më i votuar në historinë e zgjedhjeve parlamentare të Kosovës. Problemi, i nderuari kryetar Albin, është se, aq sa e keni kënaqur popullin me gjithë këtë mbështetje, në të njëjtën masë keni mbjellë shumë frikë edhe tek kundërshtarët tuaj politikë. Por të gjithë e dimë një gjë, nuk ka forcë që mund ta ndalojë dhe ta shkëpusë lidhjen e popullit tonë me LVV-në”, kishte thënë ndër të tjera Konjufca.

Ndryshe, me 28 dhjetor do të mbahen zgjedhjet e jashtëzakonshme parlamentare. Të njëjtat u shpallën nga presidentja e vendit, Vjosa Osmani, pasi dështimeve nga ana e VV’së për ta krijuar qeverinë. /GazetaExpress