Gjyqtari Rocchi: Nuk dua që Serie A të bëhet si ligat e tjera ku pesë lojtarë e rrethojnë portierin

Futboll

Gazeta Express

03/03/2026 22:08

Përgjegjësi i gjyqtarëve në Serie A, Gianluca Rocchi, përdori dy gola të Parmës për të shpjeguar qasjen e kampionatit italian ndaj pengimit të portierit, duke theksuar: “Nuk dua të shoh situata si në liga të tjera me pesë lojtarë brenda zonës së vogël”.

Çdo javë, episodet më të diskutueshme të arbitrimit analizohen në detaje në programin “Open VAR”, ku publikohen pamje nga dhoma e VAR-it dhe audio e bisedave mes gjyqtarëve.

Këtë herë, Rocchi ishte i ftuar si përfaqësues i Shoqatës së Gjyqtarëve Italianë (AIA), mes polemikave të javës së 27-të.

Një nga rastet ishte ankesa e Milanit për golin e pranuar ndaj Parmës një javë më parë, ndërsa një situatë e ngjashme nuk u penalizua në ndeshjen Parma – Cagliari këtë fundjavë.

“E përsëris që goli në Milan – Parma ishte i rregullt, por nuk më pëlqeu mënyra si u komunikua vendimi,” shpjegoi Rocchi.

“Në Parma – Cagliari, gjyqtari Massimi ua shpjegon situatën lojtarëve para goditjes nga këndi. Për sa kohë lojtarët qëndrojnë të palëvizur, nuk ka asgjë në rregullore që na detyron të ndërhyjmë”, tha ai.

Ai theksoi se në liga të tjera shihen deri në pesë lojtarë që qëndrojnë brenda zonës së vogël, por shtoi se portieri duhet të mbrohet dhe t’i garantohet liria e lëvizjes.

“Ka lëvizje që e pengojnë portierin dhe në ato raste mund të ndërhyjmë. Arbitri bëri shumë mirë, sepse pa kontaktin mes Valenti dhe Caprile dhe akordoi faull për Cagliarin”, tha ai.

Referenca për “liga të tjera” ishte kryesisht për Premierligë, ku portieri italian Guglielmo Vicario ka hasur vështirësi te Tottenham Hotspuri për shkak të grumbullimit të lojtarëve në zonë gjatë goditjeve standarde – një praktikë që tradicionalisht nuk është lejuar në Serie A.

“Nuk dua të shoh situata që i shohim në liga të tjera, sepse do të krijonin probleme për ne,” përfundoi Rocchi.

“Po flas për futbollin italian. Sipas mendimit tim, nuk mund të lejojmë që portieri të mos ketë lirinë për të luajtur. Megjithatë, në rregullore nuk thuhet se një lojtar nuk mund të qëndrojë në zonën e vogël. Do të jemi shumë të kujdesshëm në vlerësimin e këtyre situatave”, e mbylli ai./GazetaExpress/