Gjumi i dobët lidhet me rritjen e kancerit te të rinjtë

Keshilla Mjekësore

Gazeta Express

03/06/2026 22:53

Mungesa e gjumit mund të jetë një nga faktorët që po ndikon në rritjen e rasteve të kancerit tek personat nën moshën 50 vjeç, paralajmërojnë ekspertët.

Prej kohësh është sugjeruar se personat që vuajnë rregullisht nga pagjumësia mund të kenë rrezik më të lartë për zhvillimin e disa sëmundjeve, krahasuar me ata që bëjnë gjumë të rregullt dhe cilësor.

Çrregullimet e gjumit janë në rritje në Britani, ku pothuajse një e pesta e të rriturve nuk arrijnë të flenë mjaftueshëm. Në të njëjtën kohë, numri i të rinjve të diagnostikuar me kancer është rritur ndjeshëm gjatë tri dekadave të fundit.

Ekspertët ende nuk kanë një shpjegim të vetëm për këtë prirje, por në takimin vjetor të Shoqatës Amerikane të Onkologjisë Klinike në Çikago, u ngrit mundësia që gjumi i dobët të jetë një nga faktorët ndikues.

Sipas studimit, personat me probleme gjumi kishin më shumë gjasa të diagnostikoheshin me kancer të zorrës së trashë, gjirit, vezoreve dhe mitrës në moshë më të re.

Dr. Rowan Miller, onkologe në University College London, tha se gjumi i dobët mund të jetë një nga faktorët që kontribuon në rritjen e rasteve të kancerit tek të rinjtë, sidomos në rastet kur nuk ka faktorë të qartë rreziku si duhani, alkooli apo obeziteti.

Sipas saj, mënyra moderne e jetesës mund të jetë duke ndikuar në rritjen e rrezikut për disa lloje kanceri. Një nga mekanizmat e mundshëm lidhet me ndikimin që mungesa e gjumit mund të ketë në nivelet hormonale, të cilat mund të luajnë rol në zhvillimin e sëmundjes.

Studimi, i udhëhequr nga hulumtues të Jefferson Health New Jersey dhe Ochsner MD Anderson Cancer Center, zbuloi se personat me pagjumësi kishin 57 për qind më shumë gjasa të diagnostikoheshin me kancer të vezoreve brenda pesë viteve nga diagnostikimi me probleme gjumi.

Ata gjithashtu kishin më shumë se trefish rrezik për kancer të gjirit dhe rreth dyfish rrezik për kancer të zorrës së trashë gjatë së njëjtës periudhë.

Në hulumtim u përfshinë më shumë se 413 mijë persona me pagjumësi dhe mbi 18 milionë persona pa probleme gjumi. Ekspertët i cilësuan gjetjet si interesante, por theksuan se nevojiten studime të mëtejshme për të kuptuar më qartë lidhjen mes gjumit dhe kancerit.

Dr. Miller shtoi se rritja e kancerit tek të rinjtë ka shumë gjasa të jetë rezultat i disa faktorëve të kombinuar, përfshirë mungesën e aktivitetit fizik, duhanin, alkoolin, mënyrën e ushqyerjes dhe mungesën e ndërgjegjësimit për simptomat.

Nga ana tjetër, Dr. David Garley, mjek i përgjithshëm dhe drejtor i Better Sleep Clinic në Bristol, theksoi se lidhja mund të funksionojë edhe në drejtim të kundërt. Sipas tij, disa sëmundje të pazbuluara, përfshirë kancerin, mund të ndikojnë në cilësinë e gjumit përpara se të diagnostikohen.

Ai shtoi se mungesa e gjumit shpesh ndikon edhe në sjellje të tjera të shëndetshme, si aktiviteti fizik, ushqyerja e mirë dhe jeta sociale, duke rritur në mënyrë indirekte rrezikun për probleme serioze shëndetësore.

Në Britani, rreth një në tre të rritur besohet se vuan nga pagjumësia, ndërsa çdo vit regjistrohen rreth 7,500 raste të reja të kancerit të vezoreve. /GazetaExpress/