Gjilani mposht Prishtinën e Ballkani triumfon ndaj Ferizajt – fitojnë edhe Dukagjini e Drenica

Sport

Gazeta Express

31/08/2025 18:40

Xhiroja e tretë e Superligës së Kosovës ka nisur gjatë ditës së sotme.

Sot u zhvilluan katër ndeshje, derisa ndeshja e pestë do të luhet nesër mes Llapit e Dritës.

Gjilani e fitoi ndeshjen derbi të ditës, duke e mposhtur Prishtinën në stadiumin me bari sintetik.

Gjilanasit fituan 3-1 ndaj kryeqytetasve, me golat e shënuar nga Edi Basa, Senad Jarovic dhe Armend Thaqi. Golin ngushëllues për mysafirët e shënoi Blend Baftiu.

Ballkani po ashtu mori fitore me shifra të njëjta ndaj Ferizajt.

Ismajlgeci e Serebe me dy gola ia dhuruan fitoren tri herë kampionit të Kosovës në Ferizaj.

Dukagjini mori fitore me rezultat minimal si mysafir i Malishevës të Qatip Osmanit.

Altin Merlaku me golin e tij në minutën e 63-të ia dha fitoren Dukagjinit në “Liman Gegaj”.

Drenica në Skënderaj e fitoi duelin e ekipeve të sapo promovuara në elitë.

Drenicakët fituan 1-0 përballë Prishtinës së Re në “Bajram Aliu”, duke shkuar në kuotën e katër pikëve pas dy ndeshjeve. Ndeshjen e xhiros së dytë, Drenica s’e ka zhvilluar ndaj Dritës, e cila është shtyrë për një datë tjetër.

Ndeshja Llapi – Drita luhet nesër në “Zahir Pajaziti”./GazetaExpress/