Gjigantët katalanas në lëvizje, Martinez në radar

Sport

Gazeta Express

07/02/2026 16:47

Sipas raportimeve nga Spanja, Barcelona kanë identifikuar mbrojtësin e Manchester United, Lisandro Martinez, si një objektiv të mundshëm për merkato.

Raporti thekson se kampionët e La Ligës janë admirues të mëdhenj të mbrojtësit argjentinas, i cili ka bindur me paraqitjet e tij për United muajt e fundit, duke u konfirmuar si një nga figurat më të rëndësishme të repartit difensiv.

Martinez (28) iu bashkua Manchester United në vitin 2022 nga Ajax, duke ndjekur Erik ten Hag nga Amsterdami në “Old Trafford”, pas emërimit të holandezit në krye të “Djajve të Kuq”.

Që nga ai moment, argjentinasi ka regjistruar më shumë se 100 paraqitje në të gjitha kompeticionet, ndërsa këtë sezon ka zhvilluar 13 ndeshje.

Kontrata e Martinez me United është e vlefshme deri në fund të sezonit 2026/27, me klubin anglez që ka edhe opsionin për ta zgjatur marrëveshjen me një vit shtesë.

Megjithatë, raporti zbulon se Barcelona është një nga disa klubet që po ndjekin situatën e lojtarit, me katalanasit që janë i vetmi ekip interesimi i të cilit është konfirmuar zyrtarisht deri tani.

Thuhet gjithashtu se, në rast se United do të vendoste ta nxirrte në shitje, Martinez mund të vlerësohej rreth 47 milionë paund.

Pavarësisht interesimit, qëndrimi aktual i Manchester United është i qartë: Lisandro Martinez nuk është në shitje, për shkak të rolit kyç që ai ka në skuadër dhe në planet afatgjata të klubit.

Merkatoja mbetet e hapur për surpriza, por për momentin, “Old Trafford” nuk ka ndërmend të heqë dorë nga “Luani” i mbrojtjes. /GazetaExpress