Gjatë patrullimit i gjetën 500 euro në rrugë, dy policët i dorëzojnë ato në stacion- i kthehen pronarit

Lajme

Gazeta Express

23/09/2025 13:20

Dy policë në Shtime kanë gjetur 500 euro në rrugë, të cilat më pas i kanë dorëzuar në stacion policor.

“Më datë 18.09.2025, rreth orës 17:00, gjatë patrullimit në këmbë në sheshin “Ahmet Shtimja” në Shtime, dy policë të stacionit policor në Shtime kanë gjetur në tokë një shumë parash: katër kartëmonedha nga 100 € dhe dy kartëmonedha nga 50 €, me vlerë totale prej 500 €. Paratë janë dërguar menjëherë në stacionin policor dhe është njoftuar menaxhmenti i stacionit.”

Policia njofton se përmes kamerave të sigurisë është identifikuar personi që i kishte humbur paratë dhe të njëjtit i janë kthyer të hollat.

“Nëpërmjet kamerave të sigurisë është identifikuar personi që i kishte humbur paratë, i cili ishte larguar me një automjet me targa të huaja. Pas verifikimit, është konstatuar se bëhet fjalë për një 32-vjeçar, L.R., nga komuna e Shtimes, i cili është paraqitur në polici dhe i janë kthyer paratë të humbura.”

“Drejtoria Rajonale e Policisë në Ferizaj falënderon dy pjesëtarët e policisë së stacionit në Shtime për gjestin e tyre human dhe shembullor, duke dëshmuar përkushtim në shërbim të qytetarëve dhe respektim të vlerave profesionale. Ky akt rrit besimin e qytetarëve dhe kontribuon në forcimin e imazhit të Policisë së Kosovës si institucion i përgjegjshëm dhe i besueshëm.”