Gëzohen mediat serbe, e bëjnë punë të kryer eliminimin e Dritës - Gazeta Express

Gëzohen mediat serbe, e bëjnë punë të kryer eliminimin e Dritës

Futboll

Gazeta Express

11/08/2020 19:35

Mediumi serb “Informer.rs” ka reaguar pas vendimit të UEFA-s për ta anuluar ndeshjen mes Dritës dhe Linfieldit.

Ndeshja parashihej të zhvillohej në Nyon të Zvicrës, në “Colovray Stadium” nga ora 18:00 në pasditën e sotme dhe ishte e vlefshme për finalen e rundit preliminar të Ligës së Kampionëve, raporton “Zeri.info”.

Por, për shkak të rasteve me COVID-19 te skuadra kosovare, ndeshja është anuluar nga autoritetet zvicerane të shëndetësisë.

Mediumi serb “Informer.rs” e ka komentuar vendimin në fjalë të UEFA-s, duke shkruar se pas rasteve pozitive me COVID-19, ndeshja u anulua.

“Kampionia e Kosovës, Drita mbeti pa një vend në rundin e parë eliminator të Ligës së Kampionëve, pas dy rasteve pozitive me COVID-19, kështu Linfield do të luajë kundër Legia Varshavës”, ka shkruar fillimisht mediumi në fjalë.

“Sipas rregullave, Linfieldi duhet të luajë në rundin e parë eliminator të Ligës së Kampionëve”, shkruan në mes të tjerash “Informer.rs”.