Gërvalla në New York takohet me ministrin kroat, bien dakord për një komision të përbashkët për tregti

Lajme

Gazeta Express

24/09/2025 10:50

Ministrja në detyrë e Punëve të Jashtme dhe Diasporës, Donika Gërvalla, është takuar me ministrin e Jashtëm të Kroacisë, Gordan Grlić Radman, në kuadër të punimeve të Asamblesë së Përgjithshme të Kombeve të Bashkuara në Nju Jork.

Ministria e Jashtme tha se Gërvalla dhe Radman diskutuan për “hapat konkretë për thellimin e bashkëpunimit dypalësh, duke përfshirë finalizimin e marrëveshjeve në proces, nga njohja e ndërsjellë e patentë-shoferëve, deri te bashkëpunimi në fushën e shëndetësisë, arsimit dhe mbrojtjes civile”.

MPJ tha se palët u pajtuan “mbi rëndësinë e nxitjes së investimeve dhe krijimit të një Komisioni të përbashkët për tregti dhe ekonomi, në mënyrë që miqësia ndërmjet Kosovës dhe Kroacisë të reflektohet drejtpërdrejt në zhvillim konkret për qytetarët”.

Në njoftim u tha se në takim u diskutua edhe përfshirja e të rinjve në proceset shoqërore dhe demokratike.

“Forcimi i demokracisë kalon përmes përfshirjes së të rinjve. Kosova dhe Kroacia janë të vendosura t’i japin brezit të ri hapësirën që meriton, sepse nga ta varet e ardhmja e shoqërive tona”, tha Gërvalla.

Në mbyllje të takimit, Gërvalla u shpreh se Kosova “mbetet përherë mirënjohëse për mbështetjen e vazhdueshme të Kroacisë në të gjitha fazat e shtetndërtimit, duke e konsideruar Kroacinë një shtet mik dhe partner të çmuar”./Express/