“Gazzetta dello Sport”: Ancelotti e ‘kërcënoi’ Brazilin

Sport

Gazeta Express

03/05/2025 9:48

“La Gazzetta dello Sport” raporton se Carlo Ancelotti është zemëruar nga rrjedhjet në media të përfaqësuesve brazilianë dhe ka kërcënuar se do të anulonte marrëveshjen përpara se të takohej me Real Madridin dhe presidentin Florentino Perez.

Trajneri italian ka pasur një javë mjaft të ngarkuar.

Disa burime raportuan se ish-trajneri i Milanit kishte rënë dakord të merrte drejtimin e Brazilit, por më pas braktisi bisedimet kur dukej pranë nënshkrimit të kontratës.

Sipas “Gazzetta”, Ancelotti u mërzit sepse përfaqësuesit brazilianë shpërndanë detaje të pasakta në media dhe ai kërcënoi të refuzonte përfundimisht ofertën nëse thashethemet nuk ndaleshin.

Ancelotti nuk dëshironte të krijonte një situatë të sikletshme me Real Madridin, duke qenë se ai ende ka një vit kontratë.

Sipas raportimit, trajneri italian u takua këtë javë me drejtuesit e klubit dhe presidentin Florentino Perez për të sqaruar qëndrimin e tij. Disa burime pretendojnë se “Los Merengues” tashmë kanë vendosur të ndërrojnë trajner në verë, por Ancelotti ende nuk ka rënë dakord për kushtet e largimit, pasi kontrata e tij skadon në qershor 2026.

Sipas “Gazzetta” dhe Fabrizio Romanos, Brazili mbetet një opsion për trajnerin italian, por gazeta italiane këmbëngul se Carletto nuk është i gatshëm të marrë drejtimin e Seleçãos për ndeshjet kualifikuese të Botërorit kundër Ekuadorit dhe Paraguajit në qershor, vetëm disa javë pas përfundimit të kampionatit spanjoll.

Sot, të shtunën, 3 maj, Ancelotti do të mbajë një konferencë për shtyp para ndeshjes së La Ligës kundër Celta Vigos.

Sipas raportit, Ancelotti do të përqendrohet te pesë ndeshjet e fundit të kampionatit, përfshirë një sfidë vendimtare në transfertë kundër Barcelonës, përpara se të rinisë bisedimet me Brazilin dhe të diskutojë largimin e tij nga Real Madridi./GazetaExpress/