Gazetarja: Si ndërthuren lidhjet mes investitorit strategjik Pëllumb Gjoka, Ervis Martinajt dhe Oltion Bistrit

Shqiperi

Gazeta Express

27/07/2023 15:21

SPAK lëshoi 15 urdhër-arreste për zyrtarë, policë dhe biznesmenë si dhe personazhe të njohura të botës së krimit. Mes të arrestuarve janë ish-drejtuesi i Operacionales, Oltion Bistri, i shkarkuar nga detyra vetëm pak ditë më parë, drejtuesi i Prokurorisë së Kukësit, Xhevahir Lita, biznesmeni Pëllumb Gjoka dhe shoqëruesi i tij Edmond Preka. Po në kuadër të këtij operacioni, është shpallur edhe Ervis Martinaj. E ftuar në rubrikën ‘Opinion’ në News24, Lala solli detaje interesante se si lidhen këto figura me njëra-tjetrën.

“Nga mënyra se si ndërthuren personazhet është hetim interesant. Duket sikur në pamje të parë nuk kanë asnjë lidhje, por kur shikon hetimet e SPAK sheh që i lidh një sërë vrasjesh, atentate dhe veprimtari politike, si dhe politika. Kemi rastin e Pëllumb Gjokës. Sipas të dhënave duhet të theksoj se janë lëshuar 15 urdhër-arreste.

Në kërkim është shpallur Ervis Martinaj, i zhdukur që prej vitit të kaluar. Zyrtarisht Martinaj, nuk është shpallur si njeri i vdekur, por si i zhdukur. Ai dyshohet se ka urdhëruar vrasjen e Boriçit në vitin 2019. Në këtë ngjarje hetues dhe prokuror ka qenë Xhevahir Lita. Dyshohet se ka shpërdoruar detyrën pasi ka mbyllur këtë çështje. Martinaj dyshohet dhe për krijimin e sigurimit e kushteve për vrasjen e Kleant Hysenbelliu. Duhet thënë se Ilion Hato është krahu i djathtë i Martinajt dhe i njohur për botën e krimit. Ndërkohë Ardit Hasanbegaj, dyshohet se ka krijuar kushtet për vrasjen e Brahim Licit dhe Genc Tafilit. Ka kaq shumë të përfshirë. Një celular i gjendur diku ka zbuluar gjithë skemën.

Bistri akuzohet për disa vepra penale. Kjo është histori komplekse. Biznesmeni Pëllumb Gjoka është personazh i përfolur për disa çështje dhe për zaptime të tokave në Shengjin. Hetimi po mbahet top sekret. Biznesmeni është arrestuar në banesën e tij dhe nuk ka bërë rezistencë.”, tha Lala.

/Gazeta Express