Fyerje homofobe ndaj kundërshtarit, futbollisti i Man Utd suspendohet me gjashtë ndeshje

Futboll

Gazeta Express

04/03/2026 14:05

Ka ardhur një dënim i rëndë për Jack Fletcher, mesfushorin e Manchester United dhe të Anglisë U-19, pas një episodi të ndodhur në tetor në sfidën e “EFL Trophy” kundër Barnsleyt.

Federata angleze e futbollit (FA) e ka pezulluar lojtarin për gjashtë ndeshje për përdorimin e një fyerjeje homofobike ndaj një kundërshtari gjatë ndeshjes, shkruajnë mediat britanike, përcjell “Gazeta Express”.

Fletcher, i lindur në vitin 2007 dhe djali i legjendës së United, Darren Fletcher, ishte ndëshkuar me karton të kuq në atë ndeshje pasi iu kishte drejtuar kundërshtari me shprehjen “gay boy” – një frazë që u konsiderua nga referët dhe nga FA si fyerje e papranueshme në bazë të orientimit seksual.

FA ka vendosur që komentet e tij e përbëjnë një shkelje të rregullës E3.1, e cila e ndalon përdorimin e gjuhës fyese ose diskriminuese, duke i përfshirë referencat mbi orientimin seksual.

Për këtë arsye është dënuar me pezullim prej gjashtë ndeshjesh, një gjobë prej 1,500 funtesh dhe është urdhëruar ta ndjekë një program edukativ obligativ, për ta thelluar kuptimin mbi gjuhën diskriminuese dhe pasojat e saj.

Vetë lojtari vetë e ka pranuar se e ka përdorur këtë fjalë dhe nuk e ka mohuar rastin.

Ai ka kërkuar falje pas vendimit. “Jam vërtet i penduar për fjalën ofenduese që përdora në momentin e ngjarjes. Edhe pse nuk kisha asnjë qëllim ta përdorja këtë term si një fyerje homofobike, e kuptoj plotësisht që një gjuhë e tillë është e papranueshme dhe kërkova falje menjëherë pas ndeshjes. Dua ta bëj të qartë se ky moment i çrregullt i karakterit absolutisht nuk reflekton besimet ose vlerat e mia”, ka thënë Fletcher në deklaratën e tij zyrtare.

Klubi i tij, Manchester United ka konfirmuar se po punon me Fletcher për ta forcuar kuptimin e tij mbi gjuhën diskriminuese dhe se pse është e dëmshme.

Përveç pjesëmarrjes së tij të rregullt në programet e Akademisë mbi diversitetin dhe përfshirjen, lojtari do të ndjekë edhe trajnime edukative të organizuara nga FA.

Klubi vetë ka theksuar se është i përkushtuar për të qenë një skuadër gjithëpërfshirëse dhe mikpritëse për të gjithë, duke integruar në punën e tij parimet e barazisë, diversitetit dhe përfshirjes. /Gazeta Express