Promotori i Tyson Furyt në SHBA, Bob Arum, e ka hedhur poshtë idenë që kampioni i botës në peshat e rënda të luftojë në ring kundër ish-kampionit Mike Tyson.
Fury zbuloi se i ishte bërë ofertë për të luftuar kundër Tysonit në një meç ekzibicioni për bamirësi, transmeton Gazeta Express.
Tysoni ka kohë që po përgatitet për t’u kthyer në boks, pasi vazhdimisht publikon pamje nga ushtrimet e rrepta dhe u ka bërë thirrje disa rivalëve të moçëm dhe luftëtarëve të UFC-së të përballen me të.
Por Arum mendon se përballja e britanikut që mban titullin e botës në WBC me një 53-vjeçar nuk është gjë aspak e mençur dhe nuk duhet të ndodhë.
“Nëse kjo është sapo pak serioze, unë as që dua të jem pjesë e një gjëje e cila mund të jetë vërtet vdekjeprurëse”, tha Arum për Sky Sports.
“Mike Tyson ishte luftëtar i madh, por ai është në të 50-at e tij tani”, shtoi ai.
“Ai nuk duhet të luftojë kundër një boksieri i cili sapo e ka arritur kulmin në të 30-at e tij. Nuk është e drejtë dhe askush nuk duhet ta nxitë një luftë të tillë. nëse është shaka, atëherë pse jo, kujt i bën? Aq më mirë nëse e bëjnë për bamirësi”, theksoi ai. /Gazeta Express/