Fronëzohet Kryepeshkopi i Shqipërisë: Forcimi i unitetit brenda Kishës Ortodokse, nevojë e domosdoshme

Lajme

Gazeta Express

30/03/2025 17:05

Kryepeshkopi i Shqipërisë, Imzot Joan Pelushi, është fronëzuar mesditën e kësaj të shtune në Katedralen “Ngjallja e Krishtit” në Tiranë.

Gjatë fjalës së tij, ai theksoi se diktatura mundi të shkatërronte muret e jashtme të kishave, por nuk mundi të shkatërronte besimin dhe zemrat e besimtarëve.

Imzot Joani kujtoi gjithashtu kontributin e paraardhësve të tij dhe nderoi kujtimin e Kryepeshkopit të ndjerë, Anastas Janullatos, për predikimin e dashurisë dhe respektit ndaj çdo njeriu.

Ai theksoi se forcimi i unitetit brenda Kishës Ortodokse është një nevojë e domosdoshme për arritjen e qëllimit të saj dhe shtoi se “ruajtja dhe mbrojtja nga Perëndia është e rëndësishme për përballimin e sfidave të reja që vijnë, duke përfshirë ato teknologjike”.

Imzot Joani gjithashtu falënderoi martirët e lirisë që kontribuuan për shpërndarjen e dritës së besimit, duke theksuar se mirënjohja do të sjellë më afër Perëndinë.