Franco Baresi i lajmërohet tifozëve të Milanit pas operimit: Përqafime, me shumë dashuri  

Sport

Gazeta Express

03/08/2025 17:03

Legjenda e Milanit dhe Italisë, Franco Baresi, i është nënshtruar një operacioni për të hequr një nodul pulmonar dhe do të fillojë një trajtim me imunoterapi.

65-vjeçari vazhdon të punojë me kuqezinjtë si Nënkryetar Nderi, ndaj klubi publikoi një deklaratë zyrtare për gjendjen e tij.

Tek ai u zbulua një nodul pulmonar, i cili u hoq me një procedurë kirurgjikale minimalisht invazive dhe rikuperimi i tij ka kaluar pa komplikime.

Një specialist onkolog ka rekomanduar një trajtim konsolidues me imunoterapi.

Milan përcolli edhe një mesazh nga vetë Baresi:

“Të dashur tifozë, dua vetëm t’ju njoftoj se do të më duhet pak kohë për t’u rikthyer plotësisht në formë. Faleminderit AC Milan dhe të gjithëve ju për mbështetjen. Një përqafim i madh, me shumë dashuri.”

Baresi, i cili festoi 65-vjetorin në maj, ishte një lojtar që i qëndroi besnik vetëm një klubi gjatë gjithë karrierës së tij, duke kaluar nga akademia e të rinjve te Milani në vitin 1977 dhe duke qëndruar aty deri në daljen në pension në korrik 1997.

Qendërmbrojtësi zhvilloi 716 ndeshje zyrtare me kuqezinjtë, duke shënuar 33 gola dhe dhënë 24 asistime.

Ai fitoi tre Kupa të Europës, gjashtë tituj Serie A, tre Superkupa të UEFA-s, katër Superkupa të Italisë dhe dy herë Kupën Ndërkontinentale.

Baresi ishte gjithashtu një legjendë për kombëtaren italiane, me 81 paraqitje dhe pjesëmarrës në fushatën fituese të Kupës së Botës 1982./GazetaExpress/