Florian Wirtz e informon Alonson për klubin e tij të ardhshëm, pas interesimit nga City, Bayerni e Reali

Sport

Gazeta Express

06/05/2025 16:15

Mesfushori i Bayer Leverkusen, Florian Wirtz, raportohet se i ka bërë të ditur trajnerit Xabi Alonso se cilës skuadër dëshiron t’i bashkohet këtë verë.

Wirtz, 22 vjeç, ka qenë vendimtar për suksesin e Leverkusenit gjatë dy sezoneve të fundit, duke regjistruar 18 gola dhe 20 asistime në fushatën 2023/24 ku ekipi i Alonsos fitoi dy trofe dhe mbeti i pamposhtur në Bundesliga.

Këtë sezon, Leverkusen nuk ka arritur të njëjtat lartësi si vitin e kaluar, pasi Bayern Munich tashmë ka fituar titullin e Bundesligës.

Megjithatë, Wirtz ka qenë pika e ndritshme në një sezon ndryshe zhgënjyes për skuadrën e Alonsos dhe ka arritur të kontribuojë me 16 gola dhe 13 asistime në 43 paraqitje në të gjitha kompeticionet.

Si rezultat, disa nga klubet më të mëdha të Europës thuhet se janë të interesuara për ta transferuar atë këtë verë.

Manchester City, Bayern Munich dhe Real Madrid raportohen se kanë shprehur interesim për 22-vjeçarin.

Por, cilin klub preferon vetë lojtari?

Sipas të përditshmes gjermane BILD, e publikuar të martën (6 maj), reprezentuesi gjerman, që ka 29 paraqitje për kombëtaren, tashmë ka marrë vendimin për të ardhmen e tij.

Gazeta shkruan se Wirtz “i ka bërë me dije trajnerit të Bayer, Xabi Alonso, se nuk dëshiron të transferohet te Real ose City. Ai dëshiron të kalojë vetëm te Bayern Munich”.

Kjo, natyrisht, nuk është një befasi e madhe pasi Bayerni shpesh ua merr lojtarët më të mirë rivalëve të vet, me shembujt më të njohur si Robert Lewandowski dhe Mario Götze që erdhën nga Borussia Dortmund gjatë dekadës së fundit.

BILD gjithashtu raporton se familja e Wirtz ka “arritur një marrëveshje themelore” me Bayernin – megjithëse lojtari ka kontratë me Leverkusenin deri në qershor 2027 dhe mund të kërkojë një çmim transferimi rreth 102 milionë £ sipas TEAMtalk.

Trajneri i Bayernit, Vincent Kompany, e quajti Wirtz një “ndryshues loje” para përballjes së gjithgjermanëve në Ligën e Kampionëve në 1/8 e finales në mars.

Kompany tha: “Ai mbetet një ndryshues loje. Dhe lojtarë si ai nuk mund t’i zëvendësosh një për një. Duhet bërë në mënyrë kolektive ose me një qasje taktike paksa ndryshe.”

Nëse Wirtz kalon te Bayerni, ai do të bashkohet me bashkëkombasin e tij, Jamal Musiala, me të cilin është krahasuar shpesh gjatë karrierës./GazetaExpress/