Fituesi i zgjedhjeve në qytetin kroat feston me të brendshme

Lajme

Gazeta Express

19/05/2025 12:30

Ish-kryetari i komunës, Ante Kovac, ka arritur një fitore të thellë në zgjedhjet lokale duke fituar shumicën në Këshillin Komunal me listën e tij të pavarur “Stop”. Ndërkohë, posti i kryetarit të komunës i ka kaluar kumbarit të tij, Hrvoje Matejciq, ish-gazetar i HRT-së nga Korenica.

Fitorja është festuar në një atmosferë të qetë dhe të hareshme në një kafene lokale, ku Kovac dhe Matejciq u shfaqën dorë për dore, duke nxitur komente humoristike në rrjetet sociale, të cilat këtë moment e përshkruanin si “hyrje solemne e dhëndërve në altar”.

Kulmi i mbrëmjes erdhi kur Ante Kovac, në një akt simbolik e humoristik, qëndroi para të pranishmëve vetëm me të brendshme, duke theksuar karakterin joformal të festës.

Kovac ka shërbyer si kryetar komune për dy mandate dhe kësaj radhe ka vendosur që vullnetarisht të mos kandidojë, duke i dhënë përkrahjen e plotë kumbarit të tij, Matejciq.

Lidhja e tyre politike dhe personale është e gjatë. Që në vitin 2011, Kovac kishte tërhequr vëmendjen e opinionit publik teksa punonte si mësues i gjuhës kroate në shkollën fillore “dr. Franjo Tuxhman”.

Në një reportazh televiziv të asaj kohe, ai u bë viral kur shpërtheu në lot para kamerave duke komentuar ironikisht një ceremoni zyrtare për asfaltimin e një kthese para shkollës. “Shkolla organizoi një festë të tërë për një shtresë asfalti, ndërsa unë u dhashë nxënësve temën: ‘O asfalt, o asfalt i dashur!’”, kishte deklaruar ai.

Në të njëjtin insert, me tone të qarta ironike, ai përmendi edhe një “hapje solemne” të një tualeti të ri në shkollë, duke thënë se ishte i vetmi kontribut konkret i qeverisë së atëhershme rajonale të udhëhequr nga Darko Milinovic. /Index.hr