Finalissima mes Argjentinës dhe Spanjës mund të zhvillohet në “Santiago Bernabeu”

Futboll

Gazeta Express

06/03/2026 8:47

Ndeshja prestigjioze Finalissima mes Argjentinës dhe Spanjës mund të zhvillohet në stadiumin legjendar Santiago Bernabéu.

Fillimisht ishte planifikuar që kjo përballje të organizohej në Qatar, por planet kanë ndryshuar për shkak të situatës së tensionuar dhe luftës në Lindjen e Mesme. Për këtë arsye, organizatorët po shqyrtojnë alternativa të reja për zhvillimin e ndeshjes.

Sipas raportimeve të medias spanjolle Marca, opsioni që po fiton gjithnjë e më shumë terren është që Finalissima të luhet në Madrid, pikërisht në stadiumin “Santiago Bernabéu”, shtëpia e klubit Real Madrid.

Nëse ky plan konfirmohet, tifozët e futbollit mund të shohin një përballje spektakolare mes dy prej kombëtareve më të mëdha të futbollit botëror në një nga stadiumet më ikonike të Evropës.

Finalissima është ndeshja që vë përballë fituesin e Kampionatit Evropian me fituesin e Copa América, duke krijuar një duel të veçantë mes kampionëve të dy kontinenteve.