Fermeri për Kosova Live: Zgjodhëm ta dhurojmë qumështin, jo ta derdhim

Lajme

Gazeta Express

06/07/2026 15:29

Liron Krasniqi nga Rudina Ferma foli për emisionin Kosova Live në T7, pas kritikave të shumta që morën fermerët të cilët, si shenjë proteste, derdhën qumështin.

Ai tha se ferma e tyre zgjodhi një rrugë tjetër, duke shpërndarë rreth 2 mijë litra qumësht falas për qytetarët e Prizrenit dhe për qendrat e të moshuarve. Sipas tij, kjo ishte zgjidhja më e arsyeshme, megjithëse theksoi se i kupton edhe fermerët e tjerë, të cilët, siç u shpreh ai, janë të frustruar nga gjendja në sektor.

“Gjendja është mjaft e rënduar. Ka protesta të shumta nga fermerët, si pasojë e pakënaqësisë dhe ndjenjës së keqe që po krijohet nga kjo situatë në të cilën ndodhet shteti. Ne kemi zgjedhur që qumështin ta dhurojmë për qytetarët e Prizrenit, si dhe për qendrat e të moshuarve dhe kudo që kemi pasur mundësi. Kjo na është dukur zgjidhja më e arsyeshme. Megjithatë, nuk i fajësoj fermerët e tjerë që kanë protestuar, sepse janë tejet të frustruar nga kjo gjendje dhe besoj se nuk kanë gjetur një zgjidhje tjetër”.