Fatmir Limaj mbron këshilltaren e Nismës për të cilën u tha se babi i saj përfitoi nga 2 milionët e vjedhura

Gazeta Express

21/10/2020 23:04

Kryetari i Nismës Socialdemokrate, Fatmir Limaj ka folur rreth asaj që është publikuar në media se vajza e të dyshuarit, pronarit të firmës “LDA Group” për 2 milionë eurot që u transferuan nga Thesari i Shtetit, është këshilltare, zëvendëskryeministres së parë, Albulena Balaj-Halimi.

Limaj ka thënë se vajza e personit në fjalë nuk duhet të përfshihet në këtë ngjarje dhe e konsideron joprofesionale nga mediat, publikimin e një fotografie ku shihet Kadri Shala me Fatmir Limajn dhe vajzën e tij, Hajrie Shalën.

“Çka ka lidhje kjo? Krejt e padrejtë është që vajzën me vu aty me një rreth, është krejt joprofesionale. Po dalim në atë që thamë se po ka një tendencë, vajza ndoshta nuk ka asnjë lidhje me veprimin që është bërë. Kjo është joprofesionale me kthye këtë për klikime, në fund ajo nuk ka asnjë përgjegjësi. Tani sa fotografinë e bëjmë ne ka njerëz që janë në burg”, ka deklaruar Limaj.

Limaj ka treguar se si e bëjnë ata përzgjedhjen e këshilltares së zëvendëskryeministres.

“Ne kemi disa kritere siç i bëjnë edhe partitë tjera, vajza për të cilën po flas është duke doktoruar në psikologji. Është zonjë aktiviste ne promovimin e gjinisë femërore, është e martuar është nënë e fëmijëve. Plus ai tani që pash në fotografi nuk ka punuar asnjëherë në shtet”, ka thënë Limaj në Rubikon.

“Tema është se a ka hyrë sot diçka në sistem, a ka diçka përtej kësaj, a ka diçka të planifikuar, lejani këtë punë drejtësisë. Nëse kjo grua nuk një të kaluar që e ka shkel ligjin, e ka profesionin e saj, ka sukses në profesionin e saj pse mos të jetë këshilltare”, ka thënë Limaj.