Fantazma e Marisë, Mbretëreshës së Skocisë, “shfaqet” në hotelin e ndërtuar me gurët e kështjellës së ekzekutimit

Mistere

Gazeta Express

03/02/2026 20:10

Një nga figurat më të debatueshme dhe polarizuese të historisë britanike thuhet se rikthehet çdo vit në mënyrë drithëruese në një hotel të ndërtuar me gurët e kështjellës ku ajo gjeti fundin e saj tragjik.

Maria, Mbretëresha e Skocisë, u ekzekutua në Kështjellën Fotheringhay, në Northamptonshire, më 8 shkurt 1587, pasi kushërira e saj, Mbretëresha Elizabeth I, e dënoi me vdekje – një vendim i marrë me hezitim. Sovrania angleze autorizoi ekzekutimin për tradhti, pasi Maria u përfshi në një komplot për rrëzimin e Elizabethës, i zbuluar kur shefi i spiunazhit Francis Walsingham përgjuhoi korrespondencën e saj me komplotistët.

Edhe pse fajësia e saj u konsiderua e qartë, Elizabetha kishte frikë se ekzekutimi i një monarke të kurorëzuar do të krijonte një precedent të rrezikshëm, që mund të kthehej edhe kundër saj. Megjithatë, legjenda e Marisë ka mbijetuar ndër shekuj dhe sipas traditës, shpirti i saj shfaqet çdo vit rreth përvjetorit të vdekjes në Hotelin The Talbot, në qytetin Oundle.

Oundle ndodhet vetëm tre milje larg Fotheringhay dhe është një qytet tregtar historik. Një nga ndërtesat e tij më të spikatura është hoteli i klasifikuar si monument i kategorisë së parë, me një histori të lidhur ngushtë me mbretëreshën fatkeqe. Në këtë vend ka ekzistuar një han që nga vitet 1500, gjatë gjithë periudhës Tudor, ndërsa godina që shihet sot u rindërtua në vitin 1626. Sipas shumë rrëfimeve, në ndërtimin e saj janë përdorur gurë nga vetë Kështjella Fotheringhay.

Folklori lokal thotë gjithashtu se veshjet prej druri të dhomave, dritarja e madhe me harqe dhe shkallët e hotelit vijnë nga kështjella e lashtë – e njëjta ku lindi Richard III. Sot, nga kështjella ka mbetur vetëm një kodër me bar, pasi ajo u la në harresë për shekuj dhe u shkatërrua plotësisht në vitin 1628.

Sipas një tjetër tregimi, xhelati i Marisë kaloi natën para ekzekutimit në Hotelin The Talbot, ku darkoi me byrek pëllumbi.

Marian Pipe, autore e librit Northamptonshire Ghosts and Legends, i tha Northants Live se “mbretëresha tragjike thuhet se përndjek shkallët e sipërme dhe dy dhoma gjumi në katin më të lartë. Shumë njerëz kanë parë figurën fantazmë të një gruaje me një fustan të gjatë të zi, që qëndron në fund të shtratit në njërën nga dhomat. Ndonjëherë ajo shihet duke vështruar me trishtim nga dritaret me harqe pranë shkallëve.”

Sipas dëshmive, herë pas here mysafirët që flenë në atë kat zgjohen nga të qara të një gruaje, që zgjasin me orë të tëra. Thuhet se shfaqjet ndodhin më shpesh pas ndërhyrjeve apo ndryshimeve në ndërtesë.

Gjuetarët e fantazmave besojnë se ankthi i udhëtimit të fundit të Marisë është “stampuar” në materialin fizik të shkallëve, të cilat më pas u zhvendosën në han. Gjatë shekujve janë raportuar shumë dukuri të përsëritura, por më e njohura mbetet figura fantazmë me fustan të gjatë të zi – ngjyra që Maria mbante gjatë ekzekutimit, megjithëse dihet se nën të kishte veshur rroba të kuqe gjaku – duke zbritur ngadalë shkallët prej lisi.

Vizitorët që kanë qëndruar në dhomën “Mary Queen of Scots”, në krye të shkallëve, tregojnë se kanë dëgjuar të qara të pandërprera dhe të dhimbshme që vinin nga muret për orë të tëra.

Në parmakun e shkallëve ekziston edhe një gropëzim i dukshëm në dru. Legjenda thotë se ai u krijua nga unaza e rëndë e vulës mbretërore të Marisë, ndërsa ajo mbahej pas parmakut për t’u mbështetur gjatë ecjes drejt vdekjes së saj. /GazetaExpress/