Familjari i policit të vrarë: Prej që kanë nisur tensionet, ai vazhdimisht ka shërbyer në Veri

Lajme

Gazeta Express

24/09/2023 13:22

Faton Bunjaku, djali i axhës së policit të vrarë sot në Veri, Afrim Bunjaku, ka folur para mediave.

Ai ka thënë se lajmin e kanë marrë në orën 5 të mëngjesit.

“Lajmin e kam marr sot në orën 5 të mëngjesit nga PK. Kemi qenë të gjithë të shokuar, e dimë gjendjen ne Veri, lutemi që këto raste të mos ndodhin më, sepse jetët e policëve tanë çdo ditë po shuhen. E falënderoj PK’në që kanë qenë korrekt dhe na kanë asistuar gjithë kohën prej kur e kemi marrë lajmin. Çdo ditë në mesin tonë po shuhen më të mirë dhe më të dashurit tanë”, tha ai.

Faton Bunjaku foli edhe për gjendjen e familjarëve.

“I ndjeri ka lënë pas tre fëmijë, një vajzë dhe dy djem. E kemi pasur të vështirë edhe ne që t’i informojmë, por me ndihmën e Policsë dhe emergjencës kemi arritur që ngadalë t’i informojmë dhe t’i qetësojmë. Është shumë lajm i rëndë, i kobshëm.”

“Prej që kanë nisur tensionet, ai vazhdimisht ka qenë në pjesën veriore, ka shërbyer me net të tëra”, tha ai.