Evropa dhe SHBA ‘ultimatum’ presidentit Putin: Nënshkruaj armëpushimin ose përballu me sanksionet e reja masive

Lajme

Gazeta Express

10/05/2025 22:49

Liderët e Britanisë, Francës, Gjermanisë, Polonisë dhe Ukrainës, me mbështetjen e Presidentit amerikan Donald Trump, i kanë bërë një thirrje të drejtpërdrejtë Presidentit rus Vladimir Putin që të pranojë një armëpushim të pakushtëzuar 30-ditor në Ukrainë, duke paralajmëruar se përndryshe do të vendosen sanksione të reja, të koordinuara dhe të ashpra.

Gjatë një takimi në Kiev, liderët evropianë dhe Presidenti Zelensky përcaktuan 12 majin si datën e fillimit të armëpushimit, ndërsa në bisedë telefonike me Trump, ranë dakord për qëndrim të unifikuar ndaj Moskës. Kryeministri britanik Keir Starmer theksoi se është koha që Putin të tregojë nëse është serioz për paqen, duke hedhur poshtë çdo vonesë apo kushtëzim të mëtejshëm.

Ndërkohë, Kremlini reagoi me skepticizëm, duke e cilësuar nismën si “konfrontuese”, por më pas zëdhënësi Dmitry Peskov deklaroi se propozimi do të shqyrtohet, duke shtuar se Moska ka qëndrimin e saj.

Sanksionet aktuale perëndimore, të vendosura që nga pushtimi i vitit 2022, nuk kanë mjaftuar për të ndalur luftën, por kërcënimi i fundit sinjalizon një unitet të ripërtërirë transatlantik, veçanërisht pas rikthimit të Trump në Shtëpinë e Bardhë dhe pas disa tensioneve me Ukrainën. SHBA ka rikuperuar marrëdhëniet me Kievin dhe ka nënshkruar marrëveshje të reja për akses në resurset minerare ukrainase.

Presidenti francez Emmanuel Macron paralajmëroi se nëse Rusia shkel armëpushimin, sanksione masive do të aktivizohen menjëherë, në koordinim të plotë me Uashingtonin. / abcnews.al