Europa në këmbë për Gazën, dhjetëra mijëra protestojnë në Barcelonë

Lajme

Gazeta Express

04/10/2025 22:54

Dhjetëra mijëra njerëz protestuan në rrugët e Barcelonës, teksa Spanja, Italia dhe Portugalia mobilizohen në demonstrata masive kundër luftës izraelite në Gaza.

Protestat në qytetin e dytë më të madh të Spanjës e po ashtu në Madrid u thirrën disa javë më parë, ndërsa manifestimet në Romë dhe Lisbonë u organizuan mes zemërimit për ndalimin e flotës me ndihma humanitare për Gazën, e nisur nga Barcelona në përpjekjen për të thyer bllokadën ndaj territorit palestinez, shkruan A2.

Rreth 40 spanjollë, përfshirë një ish-kryebashkiak të Barcelonës, janë mes 450 aktivistëve që Izraeli largoi nga anijet dhe varkat me ndihma këtë javë. Protestuesit mbushën bulevardin qendror të Passeig de Gracia, me shumë prej tyre që mbanin pankarta me mesazhe si “Ndalni genocidin”, apo “Duart larg nga flotilia”.

Më shumë se 2 milionë njerëz iu bashkuan protestave të së premtes në Itali, teksa u mbajt edhe një ditë greve e përgjithshme për të mbështetur banorët e Gazës.

Spanja ka përjetuar një rritje të valës së mbështetjeve për Palestinën javët e fundit, ndërsa qeveria e majtë po intensifikon përpjekjet diploamtike kundër qeverisë së ekstremit të djathtë të Benjamin Netanyahut.

Protestat kundër pranisë së një ekipi çiklistësh izraelitë penguan në mënyrë të përsëritur garën spanjolle të Vueltas. Ndërkohë, kryeministri spanjoll Pedro Sanchez e quajti genocid shkatërrimin e Gazës dhe kërkoi ndalimin e ekipeve nga Izraeli në eventet sportive ndërkombëtare.  

Ndërsa ka pak gjasë që protestat të ndikojnë në qëndrimin e qeverisë izraelite, manifestuesit po shpresojnë se ato do të inkurajojnë aksione të tjera të ngjashme, duke inkurajuar liderët europianë të ndjekin linjë më të ashpër ndaj Izraelit.