‘‘Është rrugës’’, Trump thotë se po dërgon një anije-spital në Grenlandë

Lajme

Gazeta Express

22/02/2026 10:33

Presidenti amerikan Donald Trump ka deklaruar të shtunën se po dërgon një anije-spital në Greenland, ishullin arktik dhe territorin danez që ai ka kërkuar ta blejë.

“Duke punuar me Guvernatorin fantastik të Luizianës, Jeff Landry, ne do të dërgojmë një anije të shkëlqyer spitalore në Grenlandë për t’u kujdesur për shumë njerëz që janë të sëmurë dhe nuk po marrin kujdesin e duhur atje. Është rrugës!!!” shkroi presidenti në rrjetet sociale, duke publikuar një ilustrim të anijes spitalore ushtarake USNS Mercy.

Nuk është e qartë se çfarë nënkuptonte Trump në postimin e tij. Grenlanda dhe Denmark kanë sisteme publike dhe të nacionalizuara të kujdesit shëndetësor.

CNN ka kontaktuar Shtëpinë e Bardhë, Ambasadën Daneze në Uashington, zyrën e Landry-t, qeverinë daneze dhe parlamentin e Grenlandës për më shumë detaje. Pentagoni i referoi pyetjet te Komanda Veriore e SHBA-së, e cila më pas i referoi ato te Marina Amerikane. Marina nuk iu përgjigj menjëherë kërkesës për koment, përcjell Express.

Landry, të cilin Trump e emëroi në dhjetor si të dërguar të posaçëm për Grenlandën, tha në rrjetet sociale se është “krenar të punojë” së bashku me Trump për “këtë çështje të rëndësishme”.

Marina e SHBA-së ka dy anije-spital lëvizëse, USNS Mercy dhe USNS Comfort, të cilat mbështesin trupat gjatë dislokimeve dhe ofrojnë shërbime për operacione ndihme në raste fatkeqësish dhe misione humanitare. Gjatë kulmit të pandemisë Covid-19 në vitin 2020, Marina dislokoi USNS Comfort në New York City, epiqendra e shpërthimit të virusit në Shtetet e Bashkuara.

Grenlanda, e vendosur në një pozicion strategjik, është vendi me dendësinë më të ulët të popullsisë në botë dhe, për shkak të rrjetit të kufizuar rrugor, 56,000 banorët e saj udhëtojnë me anije, helikopter dhe avion mes qyteteve të ishullit. SHBA ka një bazë ushtarake në Grenlandë, Bazën Hapësinore Pituffik, e cila ndodhet në bregun perëndimor të ishullit.

Postimi i Trump vjen një muaj pasi përpjekjet e tij të përshkallëzuara për të siguruar Grenlandën tronditën aleatët evropianë, teksa ai deklaroi se SHBA nuk do të pranonte asgjë më pak se kontrollin e plotë të vendit.

Në fund të janarit, Trump njoftoi “kornizën e një marrëveshjeje të ardhshme” për Grenlandën me kreun e NATO-s, por interesi i tij i vazhdueshëm për ishullin arktik ngre pikëpyetje mbi sovranitetin e Grenlandës.

Ideja e udhëheqjes amerikane ka shqetësuar grenlandezët, përfshirë inxhinierin komunal Ludvig Petersen.

Ai i kishte thënë më parë CNN-it se kundërshtimi i tij kryesor ndaj kontrollit amerikan lidhet me çështjen e kujdesit shëndetësor privat.

“Nuk më pëlqen ideja për t’u bërë pjesë e Amerikës,” tha ai. “Shqetësimi im kryesor është gjithë kjo privatizim i shëndetësisë dhe arsimit. Nuk është diçka me të cilën jemi mësuar.”