Enzo Fernandez ndëshkohet nga Chelsea pas ‘sinjaleve’ të dërguara drejt Realit

Futboll

Gazeta Express

03/04/2026 16:40

Ylli i Chelseat, Enzo Fernández, është ndëshkuar nga klubi pasi la të kuptohet se dëshiron një transferim te Real Madridi këtë verë.

Mesfushori argjentinas nuk ishte aspak i tërhequr në deklaratat e tij para pushimit ndërkombëtar, duke pranuar se e ardhmja e tij është e pasigurt dhe duke lënë të hapur mundësinë për një kalim te “Los Blancos”.

Raportimet sugjerojnë se ai është i zhgënjyer me mungesën e progresit të Chelseat që nga ardhja e tij.

Duke folur para ndeshjes së Kupës FA ndaj Port Vale, trajneri Liam Rosenior konfirmoi se Fernándezi është ndëshkuar me një pezullim të brendshëm prej dy ndeshjesh.

“Fola me Enzon një orë më parë. Kemi marrë një vendim – ai nuk do të jetë i disponueshëm për ndeshjen e nesërme dhe as për atë ndaj Manchester City”, deklaroi Rosenior.

“Është zhgënjyese që Enzo foli në atë mënyrë. Nuk kam asgjë negative për të thënë për të, por një vijë u kalua sa i përket kulturës sonë dhe asaj që duam të ndërtojmë”, shtoi ai.

Rosenior shtoi se situata erdhi pas një periudhe të vështirë për klubin, ndërsa theksoi respektin e madh që ka për lojtarin.

“Enzo, si karakter, si person dhe si lojtar, meriton respekt maksimal për atë që ka arritur. Ai është i frustruar sepse dëshiron që ne të kemi sukses”, vazhdoi trajneri anglez.

Trajneri theksoi se vendimi për pezullimin ishte i përbashkët mes drejtuesve të klubit dhe skuadrës, duke bërë të qartë se dera nuk është e mbyllur për Fernándezin.

“Nuk bëhet fjalë vetëm për mua – drejtuesit sportivë, pronarët dhe lojtarët janë në një linjë për çdo vendim. Është një masë disiplinore. Duhet të mbrojmë kulturën e klubit dhe gjatë pushimit ndërkombëtar u kalua një vijë”, e mbylli ai.

Ndërkohë, dihet se Real Madridi është në kërkim të një mesfushori këtë verë, dhe Fernándezi është një nga opsionet në tavolinë.

Megjithatë, mbetet e paqartë nëse klubi spanjoll është i gatshëm të bëjë një ofertë të mjaftueshme për ta bindur Chelsean ta lërë të lirë, duke pasur parasysh se kontrata e tij zgjat deri në vitin 2032./GazetaExpress/