Eltoni për Parashqevi Simakun: “Në mendjen e saj ajo kujton se s’është e divorcuar, se çdo gjë është lojë”

Yjet

Gazeta Express

12/11/2025 19:36

Në një lidhje direkte me emisionin “Shqipëria Live”, biznesmeni dhe aktivisti Elton Ilirjani ka folur hapur për situatën e ndërlikuar dhe delikate të këngëtares së njohur shqiptare Parashqevi Simaku, e cila prej vitesh jeton në SHBA.

Ilirjani, i cili ka ndihmuar publikisht në përpjekjet për ta mbështetur artistën, tha se gjendja e saj aktuale është shqetësuese, pasi ajo ka refuzuar trajtimin mjekësor dhe nuk ka pranuar të pajiset me një kartë identiteti, dokument thelbësor për të përfituar ndihmën që i takon nga shteti amerikan.

“Nëse do të marrë mjekim, ajo mund të rikthehet,” – tha Ilirjani. – “Por kur një person nuk pranon të bëjë as një kartë ID, nuk mund të përfitojë asgjë. Kemi rreth 11 muaj që përpiqemi të fitojmë besimin e saj, por ajo nuk pranon të ndjekë asnjë nga këshillat tona. Doli nga spitali pa mjekim.”

Sipas Ilirjanit, problemi nuk është mungesa e mbështetjes financiare, por refuzimi i këngëtares për të bashkëpunuar me ndihmuesit e saj.

“Nuk është çështje parash. Pyetja është: deri kur mund ta mbajmë ne në këtë mënyrë? Sepse ajo nuk pranon të shkojë në spital, nuk dëshiron të trajtohet,” – u shpreh ai.

“Jeton me idenë se nuk është e divorcuar”

Elton Ilirjani tha se Parashqevia është e mbyllur në botën e saj, duke jetuar me perceptime që nuk përkojnë me realitetin.

“Me arsyetimin e saj, ajo mendon se nuk është e divorcuar dhe se çdo gjë është një lojë, se të tjerët janë munduar ta dëmtojnë. Kjo tregon se ajo ka nevojë për ndihmë të specializuar, ndoshta edhe mjekësore,” – tha ai.

Marrëdhënia me të birin

Ilirjani gjithashtu bëri të ditur se marrëdhënia e Parashqevisë me djalin e saj është ndërprerë plotësisht.

“I biri nuk dëshiron më të flasë me të. Ai ka thënë se e do nënën e tij, por dëshiron ta shohë të rikthyer në jetën normale,” – u shpreh ai.

Thirrje për ndihmë dhe ndërhyrje institucionale

Ilirjani apeloi për kujdes dhe ndërhyrje të autoriteteve, duke theksuar se gjendja e Parashqevi Simakut kërkon trajtim profesional dhe përfshirjen e institucioneve sociale dhe shëndetësore në SHBA.

“Ajo ka qenë një artiste që ka dhënë shumë për publikun shqiptar. Tani është momenti që të mos e lëmë të humbasë në heshtje,” – tha ai me tone të ndjera.

Parashqevi Simaku, një nga zërat më të dashur të muzikës shqiptare në vitet ’80-’90, është larguar prej vitesh nga skena dhe jeta publike. Prej kohësh, në rrjetet sociale dhe media janë ngritur shqetësime për gjendjen e saj shëndetësore dhe ekonomike, ndërsa deklaratat e fundit të Elton Ilirjanit sjellin një pasqyrë më të qartë dhe alarmuese të realitetit me të cilin përballet sot këngëtarja. /GazetaExpress/