Ekspozita “Unidentified False Objects” në GOCAT

Arte

Gazeta Express

12/12/2024 14:13

Më 10 dhjetor në Galerinë e Artit Bashkëkohor në Tiranë u hap ekspozita e Ardian Isufit “Unidentified False Objects – UFO”.

Kërkimi i Ardian Isufit nis nga çështje akute, midis utopisë dhe distopisë. Në këtë ekspozitë konceptuale, evolucionare në vendndodhje, përmbajtje dhe formë, duke përfshirë një kombinim të mediumeve si video, instalacion e ndërhyrje në hapësirë, “U.F.O.” kthehet në një rrugëtim artistik, ku natyra shëtitëse dhe performuese e veprave ka një matricë të dallueshme bashkëkohore.

“Unidentified False Objects” sfidon perceptimet tradicionale duke eksploruar trashëgiminë ideologjike dhe urbane të Shqipërisë gjatë periudhës komuniste. Përmes objekteve të rivendosura, instalacioneve të fuqishme dhe video-artit, Ardian Isufi krijon një dialog të thellë mbi propagandën, absurditetet e kohës dhe ndikimin e tyre në kujtesën kolektive dhe hapësirën gjeo-kulturore.

Kjo ekspozitë që përmbyll kalendarin artistik të vitit 2024 në Galerinë ‘GOCAT’, është dukshëm një qasje e zgjeruar në raport e dialog me shoqërinë, historinë, e kulturën, ku përballja e artistit me realitetin shqiptar, sado radikale dhe e drejtpërdrejtë, është njëkohësisht ndërvepruese me publikun, hapësirën e kohën.