Ekspertët kanë studiuar njerëzit që jetojnë deri në 100 vjeç –  kjo o dieta e tyre

Ushqimi/Dieta

Gazeta Express

28/01/2025 21:53

Bakteret e gjetura në zorrët e njerëzve, të cilat një ekspert i shquar i ka quajtur “Katër kalorësit e jetëgjatësisë,” mund të ndihmojnë për të arritur 100 vjet jetë.

Doktori dhe shkencëtari i Universitetit të Harvardit, Dr. William Li, kohët e fundit ishte i ftuar në një podcast ku diskutoi sesi bakteret që jetojnë në sistemin e tretjes mund të kontribuojnë në të ashtuquajturit “super-plakje” – njerëz që jetojnë 100 vjeç dhe më shumë.

Ai gjithashtu zbuloi llojet e ushqimeve që kultivojnë këto baktere në trup, duke u ofruar potencialisht kujtdo që i konsumon ato një shtysë për jetëgjatësi.

Duke folur në podcast-in “Dhru Purohit Show”, Dr. Li përmendi një studim në Itali që analizoi bakteret në zorrë tek vullnetarë, më i moshuari prej të cilëve kishte arritur moshën 114 vjeç.

Këto baktere janë pjesë e mikrobiomës së zorrëve, një ekosistem mikroorganizmash që jetojnë në sistemin tretës dhe janë jetësorë për një sërë procesesh trupore – nga ndihma në tretje, te luftimi i infeksioneve deri te stabilizimi i shëndetit mendor.

Dr. Li tha se studiuesit gjetën katër lloje bakteresh që ishin veçanërisht të shumta në zorrët e njerëzve që kishin arritur këtë moshë.

“Këto baktere – Odoribacter, Oscillobacter, Christensenella dhe Akkermansia – janë aq të pranishme në këta njerëz, sa duhet të ketë diçka që po ndodh”, tha ai transmeton GazetaExpress.

Megjithëse bakteret nuk janë provuar se shtojnë jetëgjatësinë, Dr. Li tha se ka disa mënyra në të cilat ato dihet se përmirësojnë shëndetin në përgjithësi.

“Ne nuk i dimë të gjitha funksionet e tyre, por dimë se disa prej tyre, si Odoribacter, përmirësojnë sistemin tuaj imunitar kundër E. coli dhe baktereve të tjera që mund t’ju kërcënojnë ndërsa plakeni,” tha ai.

Madje ai përmendi se ka sugjerime që Odoribacter mund të mbrojë edhe kundër kancerit, megjithëse kjo ende po studiohet.

Studime nga Japonia gjithashtu kanë zbuluar se familja e baktereve Odoribacteraceae, ku bën pjesë Odoribacter, ndihmon në rritjen e jetëgjatësisë.

Dr. Li e përshkroi Oscillobacter si “Statinën e natyrës,” pasi ndihmon në uljen e kolesterolit të keq, duke përmirësuar njëkohësisht kolesterolin e mirë, dhe duke mbrojtur shëndetin e zemrës.

Ai shtoi se Oscillobacter ndihmon trupin të bëhet më i ndjeshëm ndaj insulinës, gjë që mund të ketë rëndësi për jetëgjatësinë kur kombinohet me një dietë të shëndetshme.

Akkermansia, sipas tij, lidhet me një sërë përfitimesh shëndetësore, përfshirë:

Uljen e inflamacionit,

Përmirësimin e shëndetit metabolik,

Luftimin e kancerit,

Mbrojtjen e shëndetit të trurit dhe aftësive mendore.

Ndërsa për Christensenella, hulumtimet sugjerojnë se mbështet një metabolizëm të shëndetshëm, duke ndihmuar në parandalimin e çrregullimeve si diabeti, obeziteti dhe sëmundjet inflamatore të zorrëve.

Për sa i përket ushqimeve që ndihmojnë në kultivimin e këtyre baktereve, Dr. Li përmendi:

Për Akkermansia: Shegët, boronicat e thata, rrushin “concord,” specat djegës, mjedrat e zinj dhe uthullën e zezë kineze.

Për tre bakteret e tjera: Ai rekomandoi të ruani karbohidratet e gatuara, si orizi, patatet dhe makaronat, në frigorifer brenda natës për t’i kthyer ato në niseshte rezistente që mikroorganizmat kanë nevojë për të lulëzuar.

Ai shpjegoi se procesi i ftohjes shkakton një reagim në ushqime, duke i bërë më të ngadalta për t’u tretur dhe duke ndihmuar në rritjen e baktereve të dobishme në sistemin tretës.

Dr. Li shtoi se këto baktere mund të kenë një ndikim të rëndësishëm vetëm nëse kultivohen gjatë gjithë jetës, duke theksuar se njerëzit që fillojnë t’i kultivojnë në të 70-at nuk ka gjasa të përjetojnë një rritje të madhe në jetëgjatësinë e tyre.

Shkencëtarët besojnë se një mikrobiomë e shëndetshme ndihmon trupin në dy mënyra:

Duke prodhuar kimikate që përmirësojnë funksionet trupore, si imuniteti, truri dhe hormonet.

Duke konkurruar me mikroorganizmat e dëmshëm dhe duke penguar ato të dëmtojnë shëndetin tonë.

Sipas të dhënave më të fundit, në Angli dhe Uells ka rreth 15,000 njerëz mbi 100 vjeç, shumica prej tyre, rreth katër nga pesë, janë gra.

Ndërsa numri i njerëzve që jetojnë mbi 100 vjeç ka shënuar rritje me kalimin e kohës, ata ende përbëjnë vetëm rreth 0.02% të popullsisë.

Shkencëtarët ende po eksplorojnë kombinimin e faktorëve si gjenetika, stili i jetesës dhe përbërja e mikrobiomës që ndikojnë në jetëgjatësinë totale. /GazetaExpress/