Ekonomisti Qorrolli kërcënohet me jetë pas një paraqitjeje në Euro n’T7, publikon mesazhin dhe foton e kërcënuesit

Lajme

Gazeta Express

08/06/2025 11:58

Eksperti i ekonomisë, Adem Qorrolli është kërcënuar me jetë nga një qytetar, pas një paraqitjeje në Euro n’T7.

“O Qorroll krejt robt e shtëpis ti q****. Ruaje veten se mos po të kap ndonjë plumb mbas koke”, i ka shkruar atij Imer Nikqi, komentin dhe fotografinë e të cilit Qorrolli e publikoi në Facebook.

“Sot, përmes rrjeteve sociale, kam marrë një kërcënim me jetë si pasojë e angazhimit tim publik si ekspert i ekonomisë dhe analizave të pavarura që publikoj rregullisht. Ky kërcënim është jo vetëm personal, por edhe një goditje e drejtpërdrejtë ndaj të drejtës për të folur lirshëm dhe për të kontribuar në mënyrë profesionale për vendin tonë”, shkroi Qorrolli.

Kërcënimet, ai tha se “nuk më frikësojnë dhe nuk do të më ndalin”.

“Përkundrazi, më motivojnë të vazhdoj me edhe më shumë përkushtim. Por, këto veprime janë të papranueshme dhe duhet të trajtohen seriozisht. U bëj thirrje institucioneve përkatëse që ta marrin këtë çështje me prioritet dhe të sigurojnë mbrojtjen e çdo qytetari që shpreh lirshëm mendimin e tij. Po ashtu, inkurajoj qytetarët dhe komunitetin profesional të qëndrojnë të bashkuar kundër çdo forme presioni, frikësimi apo dhune. Liria e fjalës dhe siguria personale janë themele të demokracisë sonë – nuk guxojmë të lejojmë që të cënohen”, shkroi Qorrolli.

Ai tha se përpiqet të kontribuojë për zhvillimin ekonomik të vendit, për përmirësimin e klimës së punësimit dhe “për ndërtimin e një të ardhmeje më të mirë për qytetarët tanë”.

“Të gjitha analizat e mia janë të pavarura, të bazuara në fakte dhe qëllimi i vetëm i tyre është ndihma në orientimin e duhur të politikave zhvillimore dhe ekonomike. Kërcënimet nuk më frikësojnë dhe nuk do të më ndalin”, shkroi Qorrolli.