Edward P. Joseph: Uashingtoni nuk po tregon më tolerancë ndaj politikave të presidentit serb Aleksandar Vuciq

Lajme

Gazeta Express

15/04/2026 7:13

Ligjëruesi në Universiteti Johns Hopkins dhe eksperti i menaxhimit të konflikteve, Edward P. Joseph, vlerëson se debatet për “autonominë strategjike” të Bashkimit Evropian nuk lidhen drejtpërdrejt me politikën perëndimore ndaj Serbisë.

Sipas tij, zhvillimet e fundit tregojnë për një ashpërsim të vonuar të qëndrimit të BE-së ndaj Beogradit. Joseph thekson se kritikat publike të Marta Kos, komisionare për Zgjerim në Bashkimi Evropian, lidhur me ligjet në gjyqësor në Serbi, janë një sinjal i qartë i këtij ndryshimi. Po ashtu, në Bruksel po shqyrtohet seriozisht edhe mundësia e pezullimit të një pjese të konsiderueshme të fondeve për Serbinë.

Në të njëjtën linjë, Joseph vëren se edhe Uashingtoni nuk po tregon më tolerancë ndaj politikave të presidentit serb Aleksandar Vuciq.

“Në të njëjtën kohë, administrata Trump nuk duket e interesuar për lojërat e Vuçiqit”.

Ai thekson se administrata amerikane ka befasuar Beogradin me një qëndrim të fortë për largimin e ndikimit rus nga NIS, kompania kryesore energjetike në Serbi.

Sipas tij, ekziston pritshmëria që zhvillimet politike në Hungaria, përfshirë zgjedhjet e ardhshme, mund të përshpejtojnë shitjen e NIS-it tek kompania hungareze MOL.

“Rusia dhe mbështetësit e saj kryesorë në Serbi nuk mund të jenë të lumtur që [kryeministri në largim i Hungarisë] Viktor Orban nuk do të jetë më ai që mbikëqyr MOL-in dhe kontrollin mbi NIS-in”.

Joseph shton se një dobësim i ndikimit të Viktor Orbán dhe partisë së tij Fidesz do të ndikonte negativisht për interesat ruse në rajon, duke qenë se Orbán është parë si një faktor mbështetës i tyre brenda BE-së.

“Humbja e partisë Fidesz të Orbanit në zgjedhjet në Hungari vetëm sa mund ta inkurajojë BE-në që, më në fund, të mbajë përgjegjës Beogradin dhe presidentin Vuçiq për reformat, për shtypjen e brendshme dhe për politikat destabilizuese ndaj fqinjëve të Serbisë”.