E papritur: Bayerni arrin marrëveshje personale me Nicolas Jacksonin

Sport

Gazeta Express

25/08/2025 19:20

Bayern Munich ka arritur marrëveshje personale me sulmuesin e Chelseat, Nicolas Jackson, sipas asaj që raporton BILD.

Gjigantët gjermanë po intensifikojnë përpjekjet për të transferuar sulmuesin senegalez këtë verë.

Jackson, 24 vjeç, ka zhvilluar 81 ndeshje me fanellën e “Blues” që prej transferimit nga Villarreal, duke shënuar 30 gola. Megjithatë, ai ka humbur pozitat në hierarkinë e sulmit pas afrimeve të Liam Delap dhe Joao Pedro. Që prej gjysmëfinales së Kupës së Botës për Klube ndaj Fluminense në korrik, ku hyri si zëvendësues, Jackson nuk ka luajtur më për Chelsean.

Pas marrëveshjes së arritur me lojtarin, Bayern pritet të nisë negociatat me klubin londinez, i cili është i gatshëm të ndajë rrugët me Jackson për t’i hapur vend afrimeve të reja në sulm. Chelsea e vlerëson sulmuesin rreth 80 milionë paund, shifër që mund të jetë pengesë, por pritet të ulet teksa afrohet fundi i merkatos. Klubi anglez raportohet se është i hapur për një huazim me detyrim blerjeje.

Përveç Bayernit, interes për Jackson ka treguar edhe Aston Villa, me Unai Emery-n që dëshiron ta ribashkojë me lojtarin pas eksperiencës së përbashkët në Villarreal. Ndërkohë, Newcastle United gjithashtu është në garë, pasi kërkon një zëvendësues për Alexander Isak, i cili mund të largohet.

Ky hap i Bayernit vjen pasi dështuan përpjekjet për të marrë Nick Woltemade, pasi Stuttgart refuzoi ta shesë. Jackson shihet si një sulmues polivalent, i aftë të mbulojë disa pozicione në fazën ofensive dhe të sjellë thellësi për ekipin e Vincent Kompanyt./GazetaExpress/