Dzeko rikthehet në Serie A

Futboll

Gazeta Express

10/07/2025 16:14

Edin Dzeko, sulmuesi 39-vjeçar dhe ish-lojtari i Manchester Cityt, ka nënshkruar zyrtarisht me klubin italian Fiorentina.

Kontrata e tij me “La Viola” është e vlefshme për një vit, me mundësi rinovimi për një sezon tjetër, nëse përmbushen kushtet e parashikuara.

Dzeko i kaloi dy sezonet e fundit me Fenerbahçe-n dhe largohet nga klubi turk, i drejtuar nga Jose Mourinho, si lojtar i lirë.

Në moshën 39-vjeçare, ai po rikthehet në Itali, ku më parë ka luajtur për Romën dhe Interin.

Dzeko shënoi 21 gola në 53 ndeshje në të gjitha garat për Fenerbahçe-n sezonin e kaluar, duke treguar se ende e ka nivelin e duhur.

Në karrierën e tij, sulmuesi boshnjak ka luajtur për Željezničar në vendlindje, Usti nad Labem dhe Teplice në Çeki, si dhe për klubin gjerman Wolfsburg, ku u bë i njohur.

Ai iu bashkua Manchester Cityt në vitin 2011 për 27 milionë funte, përpara se të transferohej te Roma, Interi dhe më pas te Fenerbahçe.

Dzeko ka grumbulluar 141 paraqitje me përfaqësuesen e Bosnjës, duke shënuar 68 gola dhe dhënë 29 asistime.