Durmishi kërkon mbrojtje për punëtorët e platformave digjitale në Konferencën Ndërkombëtare të Punës

Maqedoni

Gazeta Express

11/06/2025 21:43

Në sesionin e 113-të të Konferencës Ndërkombëtare të Punës, të organizuar nga Organizata Ndërkombëtare e Punës (ONP), ministri i Ekonomisë dhe Punës së Maqedonisë së Veriut, Besar Durmishi, mbajti një fjalim të rëndësishëm mbi temën e punës së denjë në kuadër të ekonomisë së platformave.

Ministri Durmishi theksoi se me përshpejtimin e transformimit digjital të tregut të punës, kjo çështje po bëhet gjithnjë e më aktuale. Ai vuri në dukje se edhe në Maqedoninë e Veriut, megjithëse në fazë të hershme, ekonomia e platformave po njeh rritje të shpejtë dhe po ofron mundësi të reja, veçanërisht për të rinjtë.

“Platformat digjitale janë bërë një portë hyrëse në tregun e punës për shumë qytetarë tanë, duke ofruar të ardhura atje ku mungojnë vendet tradicionale të punës”, tha ministri. Por ai paralajmëroi se shumë nga këta punëtorë janë të pambrojtur, pa kontrata formale, sigurim shëndetësor, kontribute pensionale apo të drejta bazike të punës.

Durmishi bëri të ditur se Qeveria ka nisur një proces gjithëpërfshirës dialogu me të gjitha palët e interesuara, me qëllim krijimin e kornizave ligjore dhe politike që sigurojnë mbrojtje sociale dhe ekonomike për punëtorët digjitalë, pa e penguar inovacionin.

Në përmbyllje të fjalimit të tij, ministri shprehu mbështetjen e fuqishme të Maqedonisë së Veriut për përpjekjet e ONP-së për të krijuar udhëzime dhe standarde ndërkombëtare në këtë fushë “Puna e denjë duhet të jetë themeli i çdo të ardhmeje të punës, qoftë ajo fizike apo digjitale. Asnjë punëtor nuk duhet të mbetet i padukshëm, asnjë punë pa dinjitet, dhe asnjë e ardhme nuk duhet të ndërtohet pa drejtësi”, përfundoi Durmishi.